Naxçıvanda şəhidin doğum günü məzarı önündə qeyd olunub - FOTOLAR
Martın 12-də 2023-cü il sentyabrın 19-da həyata keçirilən lokal xarakterli antiterror tədbirləri zamanı şəhidlik zirvəsinə yüksələn Balabəyli Elcanın doğum günü Naxçıvan şəhərindəki məzarı önündə qeyd olunub.
NUHÇIXAN xəbər verir ki, tədbirdə şəhid ailələri, Vətən müharibəsi iştirakçıları, Naxçıvan şəhər İcra Hakimiyyətinin nümayəndələri, gənclər, media nümayəndələri, ağsaqqallar və ziyalılar, hərbçilər, şəhidin döyüş yoldaşları iştirak ediblər.
Şəhidin məzarı başında Azərbaycan Respublikasının Dövlət Himni səsləndirildikdən sonra qəhrəman şəhidlərimizin əziz xatirəsi bir dəqiqəlik sükutla yad olunub.
Anım mərasimində çıxış edənlər Müzəffər Ali Baş Komandanın rəhbərliyi ilə Azərbaycan Ordusunun qazandığı tarixi qələbədən, bu zəfərin qazanılmasında igid oğullarımızın göstərdikləri qəhrəmanlıq və şücaət nümunələrindən söz açıblar.
Anım mərasimində məktəblilər vətənpərvərlik mövzusunda şeirlər səsləndiriblər.
Şəhidin ailə üzvləri çıxış edərək bildirib ki, Vətən müharibəsində Azərbaycan xalqı, sözün həqiqi mənasında, birlik nümayiş etdirərək böyük Zəfərə nail oldu və bu Qələbə Ali Baş Komandan İlham Əliyevin rəhbərliyi ilə hərbçilərin, o cümlədən gənclərin göstərdiyi şücaətin əsl vətənpərvərlik nümunəsi idi.
Şəhidin ailə üzvləri şəhid ailələrinə göstərilən diqqət və qayğıya görə Azərbaycan Respublikasının Prezidenti İlham Əliyevə öz minnətdarlıqlarını bildiriblər.
Sonda tədbir iştirakçıları üçün ehsan süfrəsi açılıb, şəhidlərimizin ruhuna dualar oxunub.
Xatırladaq ki, Balabəyli Elcan Vasif oğlu 1992-ci il martın 12-də Naxçıvan şəhərində anadan olub. Heydər Əliyev adına Hərbi liseydə və Heydər Əliyev adına Azərbaycan Ali Hərbi Məktəbində təhsil alıb. AAHM-dən məzun olan Balabəyli Elcan leytenant hərbi rütbəsi alaraq ordu sıralarında tağım komandiri kimi xidmətə başlayıb.
2016-cı ilin aprel döyüşlərində, 2020-ci ilin Vətən müharibəsində, 2022-ci ildə isə "Qisas" əməliyyatında iştirak edib. 2023-cü il sentyabrın 19-da həyata keçirilən lokal xarakterli antiterror tədbirləri zamanı Ağdərə uğrunda gedən döyüşlərdə qəhrəmancasına şəhid olan Elcan Ali Baş Komandanımız tərəfindən 9 medal və 1 ordenlə təltif edilib.