Ordubadda Novruz bayramı qeyd olunub - FOTOLAR

NUHÇIXAN xəbər verir ki, martın 21-də Ordubad rayonunda xalqımızın milli-mənəvi dəyərlərini, adət-ənənələrini özündə yaşadan, qədim və ən əziz bayramlarından olan Novruz bayramı qeyd edilib. 

Tədbirdə Ordubad Rayon İcra Hakimiyyətinin başçısı Rəcəb Rəhimli, icra hakimiyyətinin kollektivi, hüquq-mühafizə orqanlarının, idarə, müəssisə və təşkilatların rəhbərləri və əməkdaşları, şəhid ailələrinin üzvləri, qazilər, ictimaiyyət nümayəndələri, gənclər və qonaqlar iştirak ediblər.

Şənliyin kerildiyi meydan Ordubad rayonunun məktəbdənkənar müəssisələrinin dərnəkləri tərəfindən hazırlanmış əl işləri, xonçalar, səmənilərlə bəzədilib. Bayram şənliyində Novruz adətinə uyğun olaraq Dədə Qorqud və bahar qızı hər kəsi salamlayıb, xeyir-dua verərək Novruz bayramının xalqımıza uğur, bol ruzi-bərəkət, sülh və əmin-amanlıq gətirməsini arzulayıb, bayram tonqalı yandırılıb. 

Ordubadda qədim “Novruz” adət-ənənələrinin əsas atributu olan “Xan” , Novruzun personajları Keçəl və Kosa şənliyə gələrək söhbətləri ilə əsl bayram ab- havası yaradıblar. Rayon Mədəniyyət İdarəsinin tabeliyindəki folklor və rəqs qruplarının, solistlərinin ifasında rəngarəng və maraqlı rəqs, musiqi və folklor nümunələri, Uşaq-Gənclər İdman Məktəbinin gimnastları və idmançıları tərəfindən xüsusi nömrələr nümayiş olunub.