Naxçıvan şəhərində fəaliyyət göstərən dönərxanada nöqsanlar aşkarlanıb - FOTOLAR

Naxçıvan şəhərində fəaliyyət göstərən dönərxanada aparılan plandankənar yoxlama zamanı qida təhlükəsizliyi sahəsində qüvvədə olan normativ hüquqi aktların, sanitariya norma və qaydalarının tələblərinin pozulduğu faktı aşkar edilib.

Naxçıvan Muxtar Respublikası Qida Təhlükəsizliyi Agentliyindən NUHÇIXAN-a bildirilib ki, yoxlama zamanı dönərxanada temperatur rejiminə əməl edilmədiyi, termiki emala məruz qalmış dönərin növbəti gün ərzində yenidən istifadə olunması məqsədilə təkrar dondurulması, döşəmə və divarların hamar, asan təmizlənmənin və müntəzəm dezinfeksiya işlərinin aparılmasının mümkünlüyünü təmin edən materialla üzlənmədiyi, işçilərin ilkin və dövri tibbi yoxlamadan keçmədiyi müəyyən edilib.

Faktla bağlı sahibkar barəsində protokol tərtib olunub, müvafiq məhdudlaşdırıcı qərar qəbul edilərək, qeyd olunan nöqsanların aradan qaldırılması üçün icrası məcburi göstərişlər verilib. İstehlakçı hüquqlarının qorunması istiqamətində bundan sonra da agentlik tərəfindən nəzarət tədbirləri davam etdiriləcək.