Naxçıvanda Milli Qəhrəman Natiq Qasımova həsr olunan film nümayiş olunub - VİDEO
NUHÇIXAN xəbər verir ki, Qarabağ müharibələrində itkin düşən Naxçıvanın 10 qəhrəman əsgərinin ailələri ilə görüş keçirilib. Görüş əsnasında şəhid milli qəhrəman Natiq Qasımovun döyüş yoluna həsr olunan “Oğul” bədii fimi də nümayiş olunub.
Azərbaycan Vətən Müharibəsi Veteranları İctimai Birliyinin Naxçıvan Muxtar Respublikası Təşkilatı tərəfindən Naxçıvan Dövlət Milli Dram Teatrında təşkil olunan görüşdə şəhid və itkin düşmüş hərbçilərin ailə üzvləri, müharibə veteranları, qazilər, hökumət və dövlət nümayəndələri, Əlahiddə Ümuqoşunordunun hərbçiləri iştirak ediblər.
Tədbirdə ulu öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, dövlət himnimiz səsləndirilib.
Tədbirdə birinci Qarabağ müharibəsində itkin düşən həmyerlilərimiz: İbrahim Zeynalov, Sənan Cəfərov, Muxtar Məmmədov, Nərgah Talıbov, İlyas Yusifov, Məzahir Nəcəfov, Cavid Novruzov, Faiq Novruzov, Cavid Cəfərov, eləcə də Vətən müharibəsində itkin düşən hərbçimiz İbrahim Vəlizadənin həyatı və döyüş yolundan bəhs olunan videoçarx nümayiş olunub.
Görüşdə Naxçıvan Muxtar Respublikası Ali Məclisi Aparatının Humanitar siyasət məsələləri şöbəsinin əməkdaşı Musa Məmmədov, Azərbaycan Respublikası Veteranlar İctimai Birliyinin Naxçıvan Muxtar Respublika Təşkilatının sədri Rövşən İsmayılxanlı, Türkiyə Respublikasının Naxçıvandakı Baş konsulu Asip Kaya, Ali Məclisin deputatı Yeganə Məmmədova Qarabağ müharibəsində xalqımızın apardığı mübarizədən danışıblar. Bildirilib ki, xalqımızın qəhrəmanlıq və mübarizə tarixinə qızıl hərflərlə yazılan Qarabağ müharibəsində şəhid olan və yaxud itgin düşən vətən övladları xalqımız tərəfindən unudulmur, onların xatirlələri daim əziz tutulur. Qeyd olunub ki, dövlətimiz əsir və itkin düşən vətəndaşların taleyinin daim axtarışındadır. Vurğulanıb ki, Vətən müharibəsində, həmçinin lokal antiterror tədbirləri nəticəsində düşmənə layiqli cavab verilib, 30 ildən artıq işğal altında olan əzəli torpaqlarımız Ali Baş Komandanın qətiyyəti, ordumuzun gücü sayəsində işğaldan azad olunub. Bu gün xalqımız böyük qürurla öz dədə-baba yurdlarına geri qayıdırlar.
Görüşdə itkin düşmüş hərbçilərimizin valideynləri övladları ilə bağlı xatirələrini bölüşüblər.
Milli Qəhrəman Natiq Qasımovun qardaşı Nofəl Qasımov Natiq Qasımovun şərəfli ömür yolundan, onun vətən sevgisindən danışıb, Natiq Qasımovun bugünkü və gələcək nəsillər üçün vətəpərvərlik nümnəsi olduğunu qeyd edib.
Sonda Şəhid Milli Qəhrəman Natiq Qasımovun döyüş yoluna həsr olunan “Oğul” bədii filmi nümayiş olunub.
NUHÇIXAN Naxçıvan televiziyası əməkdaşlarının tədbirdən hazırladıqları videomaterialı təqdim edir: