Naxçıvanda şəhid məzarları ziyarət olunur - FOTOLAR

Torpaq uğrunda, Vətən yolunda şəhid olan, onun keşiyini çəkib sərhəd daşına dönən oğullar heç vaxt unudulmur, əbədi yaşayırlar. II Qarabağ müharibəsində şəhidlik zirvəsinə ucalanlar bu gün hər birimizin and yerinə çevriliblər.

II Qarabağ müharibəsinin başladığı tarix, Azərbaycan Respublikası Prezidentinin 2020-ci il 2 dekabr tarixli Sərəncamı ilə ölkə­mizdə təsis olunan 27 Sentyabr – Anım Günündə muxtar respublikada da ərazi bütövlüyümüz uğrunda canlarından keçmiş şəhidlərimiz böyük ehtiramla yad olunur. NUHÇIXAN xəbər verir ki, bu gün muxtar respublikanın nazirlik, komitə, idarə, müəssisə və təşkilatlarının nümayəndələri, demək olar ki, bütün sakinlər şəhid məzarlarını ziyarət edirlər. Məzarların önünə gül dəstələri qoyulur, dualar oxunur, ərazi bütövlüyümüz uğrunda canından keçən igidlərimiz minnətdarlıqla yad edilir.

Qeyd edək ki, bu gün Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, Ali Məclis sədrinin birinci müavini Bəxtiyar Məmmədov, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin müavini Samir Seyidəhmədli və digər rəsmi şəxslər də Naxçıvan şəhər qəbiristanlığına gələrək Vətən müharibəsi şəhidlərinin məzarlarını ziyarət edərib, onlara ehtiramını bildiriblər.

Xatırladaq ki, bu gün saat 12:00-da ölkəmizdə Vətən müharibəsi şəhidlərinin xatirəsi bir dəqiqəlik sükutla yad ediləcək, nəqliyyatın hərəkəti ­dayandırılacaq.