Naxçıvanda ipoteka kreditlərinin məbləğlərində dəyişiklik edilərək maksimal səviyyəyə çatdırılıb
Ölkəmizdə eləcə də onun ayırlmaz tərkib hissəsi olan muxtar respublikada gənc ailələrin mənzilə olan tələbinin təmin olunması, rifahının yaxşılaşdırılması məsələsi prioritet vəzifə kimi müəyyən edilib. Bu istiqamətdə ardıcıl tədbirlər görülür.
Bu günlərdə Naxçıvan Muxtar Respublikası Nazirlər Kabinetində müşavirə keçirilib. Nazirlər kabinetinin mətbuat xidmətindən NUHÇIXAN-a verilən xəbərə görə, müşavirədə Naxçıvan İpoteka Fondu Açıq Səhmdar Cəmiyyətinə bir sıra tapşırıqlar verilərək gənc ailələrin mənzil-məişət şəraitinin yaxşılaşdırılması ilə əlaqədar adi ipoteka və güzəştli ipoteka kreditlərinin məbləğlərində dəyişklik edilməsi,məbləğlərin ölkə səviyyəsinə uyğunlaşdırılması müəyyən edilib.
Məlumat üçün qeyd edək ki, bununla əlaqədar olaraq Naxçıvan İpoteka Fondu Açıq Səhmdar Cəmiyyəti artıq oktyabrın 1-dən etibarən Naxçıvan Muxtar Respublikasında əhalinin ipoteka kreditlərinə əlçatanlığının artırılması məqsədilə ipoteka kreditlərinin, o cümlədən güzəştli ipoteka kreditinin maksimal məbləğini artıraraq 8%-li ipoteka krediti 150 min manata, 4%-li ipoteka krediti isə 100 min manata çatdırılıb.
Gənc ailələr İpoteka Fondunun müvəkkil bankları ilə əlaqə saxlayıb maksimal məbləğdə ipoteka kreditlərindən yararlana biləcəklər.Qeyd edək ki,kreditlərin ayrılması üçün Naxçıvan İpoteka Fondu Açıq Səhmdar Cəmiyyətinə tələb olunan qədər vəsait ayrılıb.