Naxçıvan şəhəri iş yerlərinin açılmasına görə Abşeron və Sumqayıtdan sonra regionlar üzrə 3-cüdür - 1331 iş yeri

MTM-in Dövlət Statistika Komitəsinin açıqladığı rəsmi məlumatlar əsasında apardığı təhlil göstərir ki, hər il ölkəmizdə on minlərlə yeni iş yerləri açılır və bu say hər ötən il daha da artır.

Rəsmi rəqəmlərə əsasən, 2024-cü ilin ilk 9 ayında ölkədə 69 587 yeni iş yeri açılıb və bu göstərici ötən ilin eyni dövrü ilə müqayisədə 14,3% çox olub.

2023-cü ilin sonunda ölkəmizdə 82 318, 2022-ci ildə 71 280, 2021-ci ildən cari ilin oktyabr ayının 1-dək isə ümumilikdə, 292 176 yeni iş yeri yaradılıb.

Aparılan təhlil göstərir ki, cari ilin ilk 9 ayında açılan yeni iş yerlərinin 87,15%-i və ya 60 645-i mövcud müəssisə və təşkilatların, 11,85%-i və ya 8 248-i yeni yaradılmış müəssisə və təşkilatların payına düşür. Yeni iş yerlərinin qalan 1%-i və ya 694-ü isə digər formalarda yaradılıb.

Buradakı digər yeni iş yerlərinə müxtəlif beynəlxalq və yerli layihələr, abadlıq işləri və fəaliyyəti yenidən bərpa edilmiş müəssisə və təşkilatlar daxildir.

Cari ilin ilk 9 ayında ölkəmizdə yaradılan yeni iş yerlərinin bölgələr üzrə sayına baxsaq, onların 77,43%-nin və ya 53 882 iş yerinin Bakı şəhərində açıldığını görərik. Digər bölgələrdə açılan iş yerlərinin sayı 15 705 olub və bu da ümumi göstəricinin 22,57%-ni təşkil edib.

Rəsmi rəqəmlər göstərir ki, 2024-cü ildə paytaxtda yaradılan yeni iş yerlərinin böyük əksəriyyəti mərkəzə yaxın hissələrdə açılıb. Aşağıdakı cədvəldən də göründüyü kimi, Bakıda açılan yeni iş yerlərinin böyük əksəriyyəti Nərimanov rayonunun payına düşür.

Daha dəqiq desək, cari ilin ilk 9 ayında Bakı şəhərinin Nərimanov rayonunda 11 392 yeni iş yeri açılıb. 7 800 yeni iş yeri ilə Nəsimi rayonu ikinci, 6 659 yeni iş yeri ilə Xətai rayonu üçüncü yeri tutub.

Sözügedən dövrdə Bakı şəhərinin rayonları arasında ən az iş yeri açılan rayon isə Pirallahıdır. Cari ildə bu ərazidə cəmi 8 yeni iş yeri yaradılıb.

Cari ilin ilk 9 ayında Bakı istisna olmaqla Azərbaycanın digər bölgələrində yaradılan yeni iş yerlərinin sayına baxsaq, Abşeron rayonunun 1601 yeni iş yeri ilə ilk sırada qərarlaşdığını görərik. Sumqayıt şəhəri 1341 yeni iş yeri ilə ikinci yerdədir.

İlk iki sırada yer alan bölgələr paytaxta ən yaxın ərazilər olsa da, üçüncu yeri 1331 yeni iş yeri ilə Naxçıvan şəhəri tutub. 4-cü və 5-ci sıralarda Gəncə və Şirvan şəhərləri qərarlaşıb. Cari ilin ilk 9 ayında Gəncə şəhərində 976, Şirvan şəhərində isə 878 yeni iş yeri yaradılıb.

Dövlət Statistika Komitəsinin açıqladığı rəsmi rəqəmlərə görə, hər il Azərbaycan əhalisinin sayı artsa da, işsiz şəxslərin sayında azalma qeydə alınır.

Bu azalma xüsusilə də son 4 ildə özünü bariz şəkildə göstərir. Daha dəqiq desək, cari ilin noyabr ayının ilk gününə qeydə alınan işsiz şəxslərin sayı 1 yanvar 2021-ci il tarixi ilə müqayisədə 32,9% az olub.

1 noyabr 2024-cü il tarixinə ölkədəki işsiz şəxslərin sayı 282,8 min nəfər təşkil edib ki, bu da son bir ildə işsiz şəxslərin sayının 1,4% azalması deməkdir.

Cari ilin əvvəlində Azərbaycanda işsizlik səviyyəsi 5,46%-ə bərabər idisə, noyabrın 1-nə olan göstəriciyə görə, bu rəqəm 5,33%-ə düşüb. Son 4 ilin rəqəmləri göstərir ki, Azərbaycanda işsizlik səviyyəsi hər ötən il daha da azalır.

Əlavə məlumat üçün bildirək ki, 1 yanvar 2021-ci il tarixində ölkədə işsizlik səviyyəsi 7,16%-ə bərabər olub.

Hər üç ölkənin Dövlət Statistika Komitələrinin son məlumatlarının müqayisəsi göstərir ki, Cənubi Qafqazda işsizlik səviyyəsi ən az olan ölkə Azərbaycandır. Ölkəmizdə işsizlik faizi 5,33% ( 01.11.2024) təşkil edib ki, bu da 282,8 min nəfərə bərabərdir. Say baxımından işsiz şəxslərin sayının çox olmasının səbəbi Azərbaycanın əhali sayının digər iki ölkədən ən az 3 dəfə çox olmasıdır.

Ermənistanda 1 iyul 2024-cü il tarixinə olan məlumata əsasən, işsizlik səviyyəsi 13,76%-ə (190 min nəfər), Gürcüstanda isə 1 oktyabr 2024-cü il tarixinə olan göstəriciyə əsasən, 13,82%-ə (225,7 min nəfər) bərabər olub.

Media Təhlil Mərkəzi (MTM)