Şəhid polis Fikrət Əliyevin xatirəsi anılıb - VİDEO

NUHÇIXAN xəbər verir ki, Şərur rayonunun Həmzəli kəndində Birinci Qarabağ müharibəsinin polis şəhidi Fikrət Əliyevin anım günü münasibətilə tədbir keçirilib.

Şərur Rayon İcra Hakimiyyətinin, Daxili İşlər Nazirliyi Şərur Polis İdarəsinin əməkdaşları, ictimaiyyət nümayəndələri, şəhidin ailə üzvləri, döyüş yoldaşları və kənd sakinlərinin iştirakı ilə keçirilən anım tədbirində əvvəlcə ümumilli lider Heydər Əliyevin və şəhidlərimizin xatirəsi bir dəqiqəlik sükutla yad edilib, Dövlət Himnimiz səsləndirilib.

Tədbirdə çıxış edənlər Vətən uğrunda canlarından keçən igid oğullarımızın qəhrəmanlıqlarından danışıb, onların misilsiz hünərlərini xatırladıblar.

Döyüş yoldaşları şəhid Fikrət Əliyevin döyüş yolundan, göstərdiyi qəhrəmanlıq, igidlik və şücaətlərdən söhbət açıb, onun vətənpərvər ruhda böyüməsində ailə və məktəbin böyük rolundan danışıblar. Bildirilib ki, Əliyev Fikrət Rüstəm oğlu 1990-cı ildə Şərur Rayon Polis İdarəsinə polis serjantı olaraq işə qəbul olunub. Həmin illərdə sərhədlərimizi əsasən Polis dəstələrimiz qoruyurdu, erməni daşnaqlarına qarşı Polislərimiz mubarizə aparırdı. Fikrət Əliyev də Polis dəstəsində ermənilərə qarşı çox saylı döyüşlərdə fəal iştirak edib, qəhramanlıq göstərib. 1990-cı il  dekabrın 17-də Havuş kəndində şəhidlik zirvəsinə ucalıb. Qəhrəman şəhidimiz ölümündən sonra “Qəhrəmanlığa görə Qırmızı Ulduz”  medalı ilə təltif edilib.

Anım mərasimində məktəblilər vətənpərvərlik ruhunda şeirlər səsləndiriblər.

Tədbir iştirakçıları şəhidin məzarı önünə gül dəstələri qoyub və ruhuna dualar oxuyublar.