“Sədərəkdən Şuşaya”- Qürur dolu gözyaşları - FOTOLAR
Tarix 18 yanvar 2025-ci il... Məkan Bakı...
Çoxdan gözləyirdik bu günü... Artıq dəvət olunmuş qonaqlar təyin olunmuş məkana astaca daxil olurdu. Hər kəsin üzündə qeyri-ixtiyari sevinc var idi. Kimi foyedəki poster qarşısında şəkillər çəkdirir, kimi çoxdan görmədiyi dostları ilə film haqqında söhbət edir, kimi isə fotolara diqqətlə baxırdı. Vaxt gəlib çatır... Hər kəs filmi izləmək üçün səbirsizliklə zala daxil olaraq öz yerlərini tuturdu. Filmin qəhrəmanları da onların arasında idi. Təqdimat başlayır və çıxışçılara söz verilir... İlk öncə film haqqında qısa məlumatlar verilir, filmin qəhrəmanı Nəzifə ana çıxış edir... Çıxış zamanı səsinin titrədiyi hiss olunurdu... Çünki qürurlu idi... Qürurlu olmağa da haqqı var idi...
Çıxışlar bitərkən zala sanki sakitlik çökür... Film başlayır və hər kəs filmi qürurla izləyirdi. Gözlərdən isə.... Qürur dolu sevinc göz yaşları axırdı. 36 dəqiqə zalda səssizlik hökm sürdü. Danışan ancaq film idi. Zalda oturan hər kəs demək olar ki, filmin hər saniyəsini öz telefonunda əbədiləşdirmək üçün yaddaşa alırdı...
Film bitir... Öz də “Ey vətən” musiqisi ilə ... Qürur dolu gözyaşlarının fonunda alqışlar ucalır... Qısa deyil, ən azı 2 dəqiqədən artıq. Hər kəsin film haqqında saatlarla danışmaq üçün ürəyi dolu idi. Sonda film haqqında təəssüratlar paylaşılır, qəhrəmanlar mükafatlandırılır... Və ən gözəl mükafat isə Nəzifə anaya təqdim olunur... Dövlət Sərhəd Xidmətinin Veteranlar Şurası tərəfindən Nəzifə Qaybalıyeva “Cəmşid Naxçıvanski” ordeni ilə təltif edilir...
Təqdimat bitdikən sonra hər kəs qəhrəmanlarla foto çəkdirir, müsahibələr alır, Naxçıvan televiziyasının heyətini, işıqlandırılmayan qəhrəmanlıq səhifələrini üzə çıxardığı üçün təbrik edirdi... Duyğular isə sözlə ifadə ediləsi deyildi.
Hər kəs məkandan ayrıldı... Hər şey yenidən başlayırmış kimi. Ölkənin efir məkanında yayımlanan xəbərlər, sosial platformalarda paylaşılan foto və videolar, onlara yazılan rəylər isə qürurun ən yüksək zirvəsi idi...
Uğurlar, DOĞMA KANAL!
Anar Tağıyev
Naxçıvan televiziyasının baş redaktoru