Azərbaycan əhalisinin sayı 9 milyon 981 min 457 nəfərə çatıb

Ötən il ölkə əhalisinin sayı 83 min 372 nəfər və ya 0,8 faiz artaraq 2019-cu il yanvar 1-i vəziyyətinə 9 milyon 981 min 457 nəfərə çatıb. Əhalinin 52,8 faizini şəhər, 47,2 faizini kənd sakinləri, 49,9 faizini kişilər, 50,1 faizini isə qadınlar təşkil edir.

Bu barədə NUHÇIXAN-a Dövlət Statistika Komitəsindən məlumat verilib.

Cari ilin əvvəlinə olan məlumata görə, ölkə əhalisinin 4,6 faizi Naxçıvan Muxtar Respublikasında, 22,8 faizi Bakı şəhərində, 20,3 faizi Aran, 12,9 faizi Gəncə-Qazax, 9,4 faizi Lənkəran, 30 faizi isə digər iqtisadi rayonlarında yaşayır.

Əhalinin bir kvadrat kilometrə düşən sıxlığı 115 nəfər təşkil edib. Bu göstərici Naxçıvan Muxtar Respublikasında 83, Bakı şəhərində 1064, Lənkəran və Abşeron iqtisadi rayonlarının hər birində 154, Gəncə-Qazax iqtisadi rayonunda 104, Aran iqtisadi rayonunda 96, Yuxarı Qarabağ iqtisadi rayonunda 93, Quba-Xaçmaz iqtisadi rayonunda 79, Şəki-Zaqatala iqtisadi rayonunda 70, Dağlıq Şirvan iqtisadi rayonunda 52, Kəlbəcər-Laçın iqtisadi rayonunda isə 40 nəfərə bərabər olub.