Naxçıvan məhsulları beynəlxalq  sərgidə qızıl medal qazanıb - FOTOLAR

Rusiyanın Ticarət-Sənaye Palatasının himayəsi və Kənd Təsərrüfatı Nazirliyinin dəstəyi ilə “Eksposentr” Mərkəzi Sərgi Kompleksində keçirilən “Prodexpo 2019” sərgisi başa çatıb.

Naxçıvan Muxtar Respublikası İqtisadiyyat Nazirliyinin mətbuat xidmətindən NUHÇIXAN-a verilən məlumata görə, “Made in Azerbaijan” brendinin təşviqi, yerli məhsulların xarici bazarlarda tanıdılması məqsədilə Rusiyanın paytaxtı Moskvada təşkil edilən “Prodexpo 2019” sərgisində muxtar respublikada fəaliyyət göstərən sahibkarlıq subyektləri də iştirak edib. Sərgidə “Ləzzət Qida Sənaye” MMC-nin bütün növ unlu-qənnadı məhsulları və Babək “Sirab” ASC-nin qazlı və qazsız mineral suları  nümayiş olunub.

Xarici şirkətlərin və sərgi ziyarətçilərinin böyük marağına səbəb olan “Ləzzət Qida Sənaye” MMC-nin “Lay-lay” vafili məhsulları “ən yaxşı məhsul” nominasiyasında birinci yerə layiq görülərək qızıl medalla təltif olunub.

Qeyd edək ki, XXVI beynəlxalq qida məhsulları, içkilər və onların istehsalı üçün istifadə edilən xammal sərgisinin baş sponsoru bu il də Azərbaycan olub. Sərgidə qida, şərab və spirtli içkilər sahəsində fəaliyyət göstərən 31 Azərbaycan şirkəti öz məhsullarını vahid ölkə stendində təqdim edib. Azərbaycan şirkətlərinin təmsil olunduğu ekspozisiyada kənd təsərrüfatı məhsulları, konservlər, mineral sular, müxtəlif alkoqollu və alkoqolsuz içkilər, çay, fındıq, qoz, quru meyvə, qənnadı məmulatları təklif edilib.

Ümumi sahəsi 100 min kvadratmetrdən çox olan sərgidə dünyanın 65 ölkəsində qida məhsulları və müxtəlif içkilər istehsal edən 2300-dən çox şirkət iştirak edib. 30 tematik salonda yeyinti, emal və içki sənayesi sahələri əhatəli şəkildə təqdim olunub.