Bayağı zövq, yoxsa gündəm?

Belə bir söz var. “Danışmaq gümüşdürsə, susmaq qızıldır”. Bu dəfə gümüşə dəyər vermək fikrindəyik. O mənada ki, qızıldan üstün olan dəyərlərdən – millilikdən, soya bağlılıqdan, mədəni irsdən, tarixi yaddaşdan danışmaq fikrindəyik. Daha doğrusu bu dəyərlərə “qənim” kəsilən bayağılıqdan.

“Bayağı” sözü öz açılımında sadə, bəsit və şit mənasına qədər uzana bilir. Bu sözü bir neçə alternativ sözlərlə daha təsirli formada ifadə etmək olar. Lap əla! deməli dilimizin imkanları olduqca genişdir. Bəs “Bayağılıq” necə, bu sözün sosial, mədəni həyatımıza təsiri necə?

Çox təəssüf ki, bayağılıq söz olmaqdan çıxıb ciddi təsir, biznes, reytinq vasitəsinə çevrilib. Çünki bu zillət əksər yayım vasitərlərini (Təbii ki, bütün telekanallara şamil etmək olmaz) əsir alıb. Sual olunur: Bayağılıq zövqdür, yoxsa gündəm? Bu haqda çox fikirlər yazılıb və deyilib, bəs nəticə?

Müasir dövrdə insanlar əyləncəli verilişlərə, daha çox polemika xarakterli proqramlara üstünlük verir. Onunla da razıyıq. Bəs tamaşaçı məcburdurmu bayağı verilişləri izləməyə?

Axşamlar demək olar ki, hər birimizin evinin qonağı təbii ki, televizor, bu vasitə ilə yayımlanan verilişlərdir. Bu elektron qurğuları demək olar ki, böyükdən, kiçiyə hər kəs izləyir.

Qayıtmaq istəyirəm uşaqlığıma, yadımdadır ki, biz ailəlikcə daha çox AZTV  və NTV-ni izləyirdik! Biz bu kanallarda nümayiş olunan  Azərbaycan filmləri ilə böyüdük. O filmlər ki, bütün bayağı verilişlərin hamısını satın alar. Bu gün cəmiyyəti bəlaya salan həmin o bayağı verilişlərdir. Axı niyə sosial şəbəkələrin yaxşı tərəflərini kimsə görmək istəmir?

Təbiidir ki, bayağı verilişlərin də kifayət qədər tamaşaçısı var. Görəsən insanlar niyə daha çox gündəmə problemləri, geyimləri və başqa alışqanlıqları ilə gəlmək istəyirlər? Bəs biz nə qazanırıq? İnanın ki, heçnə. Bayağı mahnılar və qulaq yoran sözlər. Hökümdür, biz ifaçının kirayə geyindiyi və taxdığı qızılların müzakirəsinə qulaq asaq? Nə ehtiyacdır? Bizə sənət yoxsa sənətçi lazımdır? Yoxsa sənətçinin toylarda qazandığı məbləğ?

Qızıl palçığa batsa da yenə də qızıldır, heç vaxt dəyərini itirməyəcək. Maarifləndirici, tərbiyə əhəmiyyətli, milli ruhlu verilişlər az saylı olsa belə həmişə arxivlərdə qorunub saxlanılacaq. Ümumən teleməkana baxanda hal-hazırda əməkdaşı olduğum Naxçıvan televiziyası maarifləndirici verilişlər hazırlamaqla sağlam tamaşaçı auditoriyası qazanıb. Bu telekanalın özünəxas ziyalı tamaşaçı auditoriyası var. İnanırıq ki, bundan sonra da Ntv öz prinsip və dəyərlərinə sadiq qalaraq Azərbaycan teleməkanında milli düşüncəyə, dövlətçilik ideyalarına xidmət etməklə öz prestijini qoruyacaq.

İlahə Mahmudova

Naxçıvan televiziyasının əməkdaşı