Naxçıvanda aprel şəhidi Rasim Məmmədovun xatirəsi anılıb
Naxçıvan Dövlət Texniki Kollecində Aprel döyüşləri zamanı Lələtəpədə şəhidlik zirvəsinə ucalan mayor Rasim Məmmədovun anım gününə həsr olunmuş tədbir keçirilib.
NUHÇIXAN xəbər verir ki, anım tədbirində əvvəlcə Azərbaycan Respublikasının ərazi bütövlüyü, suverenliyi uğrunda canından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Babək Rayon İcra Hakimiyyətinin başçısı Ovni Muradov Aprel döyüşlərinin tarixi əhəmiyyətindən bəhs edib. Bu savaşların 44 günlük müharibədə qazanılan tarixi zəfərə aparan yol olduğunu vurğulayıb və Aprel döyüşlərindəki qələbədə Rasim Məmmədov, onun kimi digər qəhrəman Vətən oğullarının misilsiz rolundan danışıb.
Tədbirdə Naxçıvan Muxtar Respublikası Ali Məclisinin deputatı Ülkər Bayramova və "Naxçıvan Muxtar Respublikası Televiziya və Radio Verilişləri" Qapalı Səhmdar Cəmiyyətinin sədri Sahil Tahirli çıxış ediblər.
Tədbirin bədii hissəsində kollecin tələbə xor qrupu tərəfindən "Şəhidim" adlı mahnı ifa olunub, Rasim Məmmədova həsr olunmuş şeirlər səsləndirilib və videoçarx nümayiş etdirilib.
Tədbirdə iştirak edən şəhidin anası Bəsti Məmmədovaya xatirə plaketi təqdim olunub.
"Vətən fədailəri" layihəsinin dəstəkçisi Şahin Məmmədov Naxçıvan Dövlət Texniki Kollecinin direktoru Asəf Ruşanova şəhid kitabları toplusunu təqdim edib.
Sonda xatirə fotosu çəkdirilib.