Naxçıvanda aprel şəhidi Rasim Məmmədovun anım günü keçirilib - FOTOLAR
NUHÇIXAN xəbər verir ki, Babək rayon Cəhri qəsəbəsində Aprel döyüşləri zamanı Lələtəpədə şəhidlik zirvəsinə ucalan mayor Rasim Məmmədovun anım günü keçirilib.
Şəhidin məzarı önündə keçirilən tədbirdə şəhid ailələri, Vətən müharibəsi iştirakçıları,Naxçıvan Muxtar Respublikası Ali Məclisinin deputatları, Babək rayon İcra Hakimiyyətinin nümayəndələri, ictimaiyyət nümayəndələri, ağsaqqallar və ziyalılar, hərbçilər, şəhidin döyüş yoldaşları iştirak ediblər.
Şəhidin məzarı başında Azərbaycan Respublikasının Dövlət Himni səsləndirildikdən sonra qəhrəman şəhidlərimizin əziz xatirəsi bir dəqiqəlik sükutla yad olunub.
Anım mərasimində çıxış edənlər Müzəffər Ali Baş Komandanın rəhbərliyi ilə Azərbaycan Ordusunun qazandığı tarixi qələbədən, bu zəfərin qazanılmasında igid oğullarımızın göstərdikləri qəhrəmanlıq və şücaət nümunələrindən söz açıblar.
Şəhidin ailə üzvləri çıxış edərək bildirib ki, Vətən müharibəsində Azərbaycan xalqı, sözün həqiqi mənasında, birlik nümayiş etdirərək böyük Zəfərə nail oldu və bu Qələbə Ali Baş Komandan İlham Əliyevin rəhbərliyi ilə hərbçilərin, o cümlədən gənclərin göstərdiyi şücaətin əsl vətənpərvərlik nümunəsi idi.
Şəhidin ailə üzvləri şəhid ailələrinə göstərilən diqqət və qayğıya görə Azərbaycan Respublikasının Prezidenti İlham Əliyevə öz minnətdarlıqlarını bildiriblər.
Sonda tədbir iştirakçıları üçün ehsan süfrəsi açılıb, şəhidlərimizin ruhuna dualar oxunub.
Xatırladaq ki, Məmmədov Rasim Əbdül oğlu 1977-ci il mayın 20-də Babək rayonunun Cəhri qəsəbəsində anadan olub. Heydər Əliyev adına Hərbi liseydə və Heydər Əliyev adına Azərbaycan Ali Hərbi Məktəbində təhsil alıb. 2000-ci ildə AAHM-dən məzun olan Rasim Məmmədov leytenant hərbi rütbəsi alaraq ordu sıralarında "təlim taborunun tuşlayıcı tağımının komandiri kimi xidmətə başlayıb. 2016-cı il aprelin 4-də Füzuli istiqamətində gedən döyüşlərdə şəhid olub.
Ali Baş Komandanımız tərəfindən "Vətən Uğrunda" və "Qüsursuz xidmətə görə" II dərəcəli medallarla təltif olunub.