Akademik Zərifə Əliyevanın anadan olmasının 102 illiyi ilə əlaqədar tədbir keçirilib - FOTOLAR

A- A A+

NUHÇIXAN xəbər verir ki, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Milli Müdafiə Universitetinin tabeliyində fəaliyyət göstərən Naxçıvan Hərbi Kollecinin birgə təşkilatçılığı ilə “Unudulmaz alim, qayğıkeş insan - Zərifə xanım Əliyeva” mövzusunda tədbir keçirilib. 

Tədbirin əvvəlində Ulu Öndər Heydər Əliyevin, Akademik Zərifə xanım Əliyevanın və vətən uğrunda şəhadətə yüksələn şəhidlərin əziz xatirəsi yad edilib və Azərbaycan Respublikasının Dövlət Himni səsləndirilib.

Tədbiri giriş sözü ilə açan Milli Müdafiə Universitetinin tabeliyində fəaliyyət göstərən Naxçıvan Hərbi Kollecinin rəis müavini Hikmət Hacıyev tədbir iştirakçılarını salamlayaraq, Zərifə Əliyevanın mənalı və şərəfli həyat yolu, zəngin və çoxşaxəli irsi haqqında danışmış, bütün müsabiqə qaliblərinə uğurlar arzulamış və tədbirin təşkil olunmasında əməyi keçən hər kəsə öz təşəkkürünü bildirmişdir. 

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək bildirmişdir ki, tarix boyu Azərbaycan qadınları həyatın bütün sahələrində fəal iştirak edərək mənəvi keyfiyyətlərinin zənginliyi ilə seçilmiş, dünya siyasətində öz sözü olan, cəmiyyətin inkişafında öz dəsti-xətti olan bir qüvvə olmuşdurlar.

Naxçıvan Muxtar Respublikasında da qadınlıq vəzifələrinin öhdəsindən layiqincə gələn, həmçinin bütün sahələrdə fəallıq göstərən qadınlarımız üstünlük təşkil edirlər. Onlar içərisində ailə dəyərlərinin qorunması və Azərbaycan elminə mühüm töhfələr verən qadınlarımız da vardır ki, bu qadınlardan XX əsrin sonunda iki akademik yetişmişdir. Onlardan biri qədim yaşayış yerlərindən olan Şahtaxtı kəndində anadan olmuş akademik Zərifə xanım Əliyevadır. Zərifə xanım Əliyeva ümummilli lider Heydər Əliyevin həyat yoldaşı, sirdaşı, ölkəmizə İlham Əliyev kimi rəhbər bəxş etmiş, görkəmli oftalmoloq alim, mənalı və zəngin həyat yolu keçən bir ziyalı xanım olmuşdur. Ağxalatlı Azərbaycan qadını gənc həkimlərin yetişdirilməsinə böyük əhəmiyyət vermiş, alim qadın kimi çox yüksək pillələrə, zirvələrə qalxmış oftalmoloqlarımızdan biri idi. Zərifə xanım Əliyeva həkimlik və alimlik kimi gərgin fəaliyyətində harada yaşamasından və işləməsindən asılı olmayaraq həmişə doğma diyarımız olan Naxçıvanla sıx bağlı olmuş, regionda bir sıra təhlükəli göz xəstəliklərinin müalicə edilməsində öz səylərini əsirgəməmiş, öz torpağının yüzlərlə insanına dünyada əvəzedilməz nemət olan göz işığı bəxş etmişdir. Həmçinin Zərifə xanım çox sədaqətli həyat yoldaşı idi. Ümummilli liderimiz H.Əliyev vətəninə, xalqına olan tükənməz məhəbbətini bu insanın fəaliyyətində əks etdirdi. Ümummilli liderimizin xalqı üçün gördüyü bütün işlərdə, bir yaxşı ömür-gün yoldaşı kimi Zərifə xanım Əliyevanın əməyinin, istedadının, qəlbinin də bir zərrəsi var idi. Daha sonra Ramilə Seyidova əlavə etmişdir ki, “Unudulmaz alim, qayğıkeş insan - Zərifə xanım Əliyeva” mövzusundakı esse musabiqəsinə 230 nəfər esse təqdim etmişdir. Müsabiqəyə təqdim edilmiş işlərin qiymətləndirilməsi Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Milli Müdafiə Universitetinin nəzdində Naxçıvan Hərbi Kolleci tərəfindən təsdiq olunmuş münsiflər heyəti tərəfindən müəyyənləşdirilmişdir. Sonda Komitə sədri müsabiqədə iştirak edənlərə öz təşəkkürünü bildirmiş, müsabiqə qaliblərini təbrik edərək, onlara işlərində, gələcək həyatlarında uğurlar arzulamışdır.

Sonra Naxçıvan Muxtar Respublikasının Nazirlər Kabinetinin Sosial məsələlər şöbəsinin böyük məsləhətçisi Elvira Cəfərli çıxış edərək bildirib ki, bu gün biz Azərbaycan oftalmologiya elminin tanınmış nümayəndəsi, böyük alim və fədakar insan akademik Zərifə xanım Əliyevanın yubileyini ehtiramla qeyd edirik. E. Cəfərli qeyd edib ki, Zərifə xanım yalnız peşəkar oftalmoloq deyil, həm də mənəviyyatı, insanlara və elmə olan dərin sevgisi ilə qəlblərdə iz qoymuş əsl ziyalı idi. Bu əlamətdar yubiley münasibətilə, Zərifə xanımı böyük ehtiramla yad edir, Azərbaycan səhiyyəsinə verdiyi əvəzsiz töfhələri böyük hörmətlə xatırlayırıq. 

Daha sonra Naxçıvan Muxtar Respublikası Xəstəxanasının cərrah oftalmoloqu Kəmalə Əliyeva, Culfa rayon Dizə kənd tam orta məktəbinin müəllimi Ədalət Əhmədov çıxış edərək gözəl ana, vəfalı ömür-gün yoldaşı, intellektual keyfiyyətləri özündə birləşdirən ziyalı, dünya tibb elminə əvəzolunmaz töfhələr vermiş böyük oftalmoloq alim Zərifə xanım Əliyevanın həyatı, elmi və yaradıcılıq fəaliyyətindən bəhs ediblər, həmçinin Ə.Əhmədov Zərifə Əliyeva haqqında öz təəssüratlarını bölüşmüşdür. 

Çıxışların ardından müsabiqədə iştirak edən qaliblər mükafatlandırılıblar. 

Tədbirin davamında Zərifə xanım Əliyevaya həsr olunmuş videoçarxa baxış olmuş və Naxçıvan Qızlar Liseyinin şagirdlərinin hazırladığı kompozisiya göstərilmişdir.

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: