Naxçıvan gömrükçüləri 8 kiloqramdan artıq miqdarda narkotik qaçaqmalçılığının qarşısını alıblar

Cinayət faktının biri rentgen-nəzarət qurğusunun köməyi ilə, digəri isə şəxsi yoxlama əsasında aşkarlanıb.

NUHÇIXAN Naxçıvan Muxtar Respublikası Dövlət Gömrük Komitəsinin saytına istinadən xəbər verir ki, Gömrük əməkdaşları tərəfindən narkotik vasitələrin qanunsuz dövriyyəsinə qarşı mübarizə tədbirləri nəticəsində narkotik qaçaqmalçılığına yönəlmiş iki cəhdin qarşısı alınıb.

Belə ki, Şahtaxtı gömrük-sərhəd buraxılış məntəqəsindən keçməklə Naxçıvan Muxtar Respublikasına gələn 1979-cu il təvəllüdlü xarici ölkə vətəndaşı Golsanamlou Peiman Moharram oğlunun idarə etdiyi Renault markalı yük maşınına rentgen qurğusu vasitəsilə gömrük baxışı həyata keçirilən zaman daş yükünün içərisində şübhəli təsvirlər müəyyən olunub.

Qoşquya yüklənmiş mərmərin içərisindəki şübhəli daşa gömrükçülər tərəfindən fiziki baxış həyata keçirilərkən 4 ədəd plastik butulkaya yığılmaqla həmin daşın içinə yerləşdirmə üsulu ilə gizlədilmiş 8 kq 169 qram narkotik vasitə -tiryək aşkar edilərək götürülüb.

Narkotik gizlədilmiş avtonəqliyyat vasitəsinin Naxçıvan Muxtar Respublikası ərazisindən tranzit keçməklə Türkiyə Respublikası üzərindən Avropaya gedəcəyi müəyyən olunub.

Digər bir narkotik qaçaqmalçılığı faktı isə Culfa sərhəd-keçid məntəqəsində qeydə alınıb. Belə ki, 1978-ci il təvəllüdlü Azərbaycan Respublikası vətəndaşı Həsənova Nəzakət Qafar qızı Naxçıvan Muxtar Respublikasına gələrkən şübhəli şəxs qismində saxlanılaraq  şəxsi yoxlamaya cəlb olunub. Ondan 46,8 qram həşiş, 21,2 qram marixuana, 4,6 qram metamfetamin aşkarlanaraq götürülüb.

Hər iki fakt üzrə Naxçıvan Muxtar Respublikası Dövlət Gömrük Komitəsinin İstintaq bölməsi tərəfindən Azərbaycan Respublikası Cinayət Məcəlləsinin 206.2 (qaçaqmalçılıq yolu ilə narkotik vasitələrin gömrük nəzarətindən kənar və ya ondan gizli keçirilməsi) maddəsi ilə cinayət işi açılıb.