Şagirdlər ali təhsil müəssisələrində olublar - FOTOLAR
NUHÇIXAN xəbər verir ki, Naxçıvan Muxtar Respublikası Təhsil Nazirliyi tərəfindən muxtar respublikanın rayonlarındakı ümumtəhsil məktəblərində təhsil alan şagirdlərin ali təhsil müəssisələrinə ekskursiyaları təşkil olunub.
Ekskursiyada Şərur rayon ümumtəhsil məktəbləri üzrə 40, Sədərək rayon ümumtəhsil məktəbləri üzrə 15, Şərur Şəhər Fizika-Riyaziyyat Təmayüllü Lisey üzrə 15 şagird olmaqla, ümumilikdə 70 şagird iştirak edib.
Yuxarı sinif şagirdləri üçün təşkil olunan bu ekskursiyanın məqsədi şagirdləri muxtar respublikadakı ali təhsil müəssisələrində yaradılmış hərtərəfli şəraitlə tanış etməkdir. Belə ekskursiyalar həmçinin abituriyentlərin ixtisas seçiminə də dəstək olacaq.
Ekskursiya zamanı şagirdlər Naxçıvan Dövlət Universitetində, "Naxçıvan" Universitetində və Naxçıvan Müəllimlər İnstitutunda olublar. Tanışlıq zamanı şagirdlərə ali təhsil ocaqları haqqında geniş məlumat verilib.
Şagirdlər ali təhsil müəssisələrində kadr hazırlığı aparılan ixtisaslar, tələbələr üçün yaradılan şərait və Tələbə Gənclər Təşkilatının gördüyü işlər haqqında məlumat alıblar. Eyni zamanda onlar dərslərdə də iştirak edib, müəllim və tələbələrlə görüşüb, kitabxana, akt zalı, idman zalı, İnformasiya Kommunikasiya Texnologiyaları şöbəsi ilə, kompüter və elektron lövhəli otaqlarla, laboratoriyalarla, yataqxana ilə yaxından tanış olaraq maraqlı məlumatlar əldə ediblər.
Qeyd edək ki, martın 15-dək davam edəcək ekskursiyalarda muxtar respublikanın bütün şəhər və rayon məktəbləri olmaqla, ümumilikdə 300-dən çox şagird iştirak edəcək.
Turab Hacızadə