NHAİS-in Naxçıvanda tətbiqinə dair təlim keçirilib - FOTOLAR
Azərbaycan Respublikasının Rəqəmsal İnkişaf və Nəqliyyat Nazirliyi və Naxçıvan Muxtar Respublikasının Rəqəmsal İnkişaf və Nəqliyyat Nazirliyinin birgə təşkilatçılığı ilə muxtar respublikada fəaliyyət göstərən dövlət qurumlarının əməkdaşları üçün “Normativ hüquqi aktlar” informasiya sisteminin (NHAİS) muxtar respublikada tətbiqinə dair ilkin təlim keçirilib. Təlim “Dövlət orqanlarında (qurumlarında) normayaratma fəaliyyətinin təkmilləşdirilməsi və bundan irəli gələn bir sıra məsələlərin tənzimlənməsi haqqında” Azərbaycan Respublikası Prezidentinin 6 oktyabr 2023-cü il tarixli 2328 nömrəli Fərmanının icrası çərçivəsində təşkil olunub.
Naxçıvan Muxtar Respublikası Rəqəmsal İnkişaf və Nəqliyyat Nazirliyinin mətbuat xidmətindən NUHÇIXAN-a verilən məlumata görə, Naxçıvan Muxtar Respublikasında NHAİS-in tətbiq edilməsi normayaratma prosesinin müasir tələblərə uyğunlaşdırılmasına, dövlət idarəçiliyində operativliyin artırılmasına və elektron hökumət prinsiplərinin genişləndirilməsinə xidmət edəcək.
Muxtar respublikada normativ hüquqi akt layihələrinin elektron qaydada hazırlanması, dövlət qurumları arasında razılaşdırılması və müvafiq yuxarı orqanlara təqdim edilməsi NHAİS vasitəsilə təmin ediləcək. Bu isə qurumların fəaliyyətində səmərəliliyin və şəffaflığın artırılmasına, vaxt itkisinin minimuma endirilməsinə, eləcə də qurumlar arasında koordinasiyanın güclənməsinə şərait yaradacaq.
Qeyd edək ki, təlimdə dövlət qurumlarının 120-dən artıq əməkdaşı iştirak edib. Yeni sistemin tətbiqi muxtar respublikada fəaliyyət göstərən dövlət orqanlarının normayaratma fəaliyyətinin keyfiyyətini yüksəltməklə yanaşı, vətəndaşların və ictimaiyyətin dövlət idarəçiliyinə etimadının artırılmasına da xidmət edəcək.