Naxçıvan şəhərində quruculuq işləri davam etdirilir - FOTOLAR

Muxtar respublikada aparılan genişmiqyaslı quruculuq işlərində məktəb tikintisi xüsusi yer tutur. Ötən dövr ərzində muxtar respublikamızda 200-dən çox təhsil müəssisəsi tikilib və ya əsaslı şəkildə yenidən qurulub.

NUHÇIXAN xəbər verir ki, hazırda Naxçıvan şəhərindəki 5 nömrəli tam orta məktəbin binası yenidən qurulur. 1148 şagird yerlik olacaq məktəbdə əlavə 2 korpus tikilir. Burada 58 sinif otağı, 2 elektron lövhəli sinif, müxtəlif laboratoriyalar, 3 kompüter otağı, idman zalı, kitabxana, hərbi kabinə və digər otaqlar yaradılır. 

Qeyd edək ki, bu təhsil müəssisəsi muxtar respublikanın qabaqcıl məktəblərindəndir. Bu il məktəbi 57 şagird bitirib. Həmin məzunlardan  50-si ölkəmizin müxtəlif ali məktəblərinə qəbul olunub. 13 məzun 500-700 arası bal toplayıb. Məktəb binasının  yenidən qurulması  qazanılan uğurların  daha da artırılmasına lazımi şərait yaradacaq.

Muxtar respublikamızda həyata keçirilən sosial-iqtisadi siyasətin əsas istiqamətlərindən biri də əhalinin mənzil-məişət şəraitinin yaxşılaşdırılmasıdır.

 Hazırda Naxçıvan şəhərinin Heydər Əliyev prospektində yeni yaşayış binası tikilir. 44 mənzilli 6 mərtəbəli yeni yaşayış binası milli və müasir memarlıq üslubunda inşa olunur.  Binada ikiotaqlı, üçotaqlı, dördotaqlı, yeddiotaqlı və doqquzotaqlı mənzillər yerləşəcək. Mənzillərin sahəsi ikiotaqlılarda 90, üçotaqlılarda 110 və 150, dördotaqlılarda 153, 165 və 175, yeddi otaqlılarda 325 və 360, doqquzotaqlıda isə 420 kvadratmetr olacaq. Yaşayış binasında lift quraşdırılacaq, zirzəmidə 29 yerlik avtomobil dayanacağı yaradılacaq. 4 girişi olan binanın birinci mərtəbəsində 12 mağaza istifadəyə veriləcək. 

Əbülfəz  Dünyamalıyev