Milli Qəhrəman Çingiz Mustafayevin doğum günüdür
Bu gün Azərbaycanın görkəmli telejurnalisti, şəhid və Milli Qəhrəmanı Çingiz Mustafayevin doğum günüdür. Onun anadan olmasından 65 il ötür.
Çingiz Mustafayev 1960-cı il avqustun 29-da Rusiya Federasiyasının Həştərxan vilayətində, Kapustin-Yar kəndində anadan olub. Atası onun hərbçi, anası isə həkim olmasını istəyirdi. Valideynlərinin arzularını həyata keçirmək üçün əvvəlcə Cəmşid Naxçıvanski adına hərbi liseydə, daha sonra isə Azərbaycan Tibb İnstitutunda təhsil alıb. 1983-cü ildə institutu bitirərək həkim kimi fəaliyyətə başlayıb.
Gənclik illərində Çingiz Mustafayev Azərbaycanın ilk DJ-lərindən biri kimi tanınıb və SSRİ-də ilk disko-klublardan birini yaratmış novatorlardan olub.
1990-cı illərin əvvəllərində Ermənistanın Azərbaycana qarşı başladığı hərbi təcavüz fonunda Çingiz Mustafayev jurnalistikaya keçərək ön cəbhədən reportajlar hazırlamağa başlayıb. O, yalnız Azərbaycan ictimaiyyətinə deyil, həm də beynəlxalq auditoriyaya informasiya çatdırmağı qarşısına məqsəd qoyub. Onun çəkdiyi materiallar ABŞ və Avropa ölkələrinin aparıcı media qurumlarında yayımlanıb.
Dövlət televiziyasında senzura səbəbilə müstəqil fəaliyyət göstərmək istəyən Çingiz Mustafayev “215 KL” studiyasının yaradılmasına təşəbbüs göstərib. Bu studiya vasitəsilə o, cəbhədən eksklüziv reportajlar təqdim edib.
Qısa zaman ərzində Qarabağ müharibəsi haqqında 18 sənədli film çəkən Çingiz Mustafayev, təkcə reportyor kimi deyil, həm də döyüşçü kimi fəaliyyət göstərib.
O, beynəlxalq aləmdə xüsusilə Xocalı soyqırımı zamanı çəkdiyi görüntülərlə tanınıb. Fevralın 28-də faciə yerinə gedərək Ermənistan silahlı qüvvələrinin törətdiyi vəhşilikləri lentə alıb. Sonradan həmin kadrlar əsasında “Xocalı – Əsrin Faciəsi” adlı sənədli film hazırlanıb.
Çingiz Mustafayev 1992-ci il iyunun 15-də, Xocalı rayonunun Naxçıvanik kəndində növbəti çəkiliş zamanı mərmi qəlpəsi nəticəsində şəhid olub. Hadisə zamanı o, kameranı son ana qədər söndürməyib.
Şəhid jurnalist ölümündən sonra "Azərbaycanın Milli Qəhrəmanı" adına layiq görülüb və Bakıdakı Şəhidlər Xiyabanında dəfn olunub.
Nurtac İsmayılova
Naxçıvan Dövlət Universitetinin "Jurnalistika " ixtisası üzrə
II kurs tələbəsi