Naxçıvanda Milli Teatr Günü qeyd edilib - FOTOLAR
NUHÇIXAN xəbər verir ki, Cəlil Məmmədquluzadə adına Naxçivan Dövlət Musiqili Dram Teatrında Milli Teatr Günü münasibətilə tədbir keçirilib. Tədbirdə Naxçıvan Muxtar Respublikasının Mədəniyyət naziri Natəvan Qədimovaqeyd edib ki, Azərbaycan Milli Teatrının yaranmasının 146 il ötür. Nazir bu münasibətlə tədbir iştirakçılarını və teatr xadimlərini təbrik edib.
Qeyd olunub ki, bu yaxınlarda Azərbaycan Respublikası Prezidentinin mədəniyyət xadimləri ilə görüşü və 4 mart 2019-cu il tarixdə “Azərbaycan teatrlarının inkişafı ilə bağlı əlavə tədbirlər haqqında” Sərəncamı bu sahənin inkişafına göstərilən qayğının bariz nümunəsidir.
Naxçıvan Muxtar Respublikasında da teatrların fəaliyyətinə hərtərəfli dövlət qayğısı göstərilir. Hazırda muxtar respublikada fəaliyyət göstərən Cəlil Məmmədquluzadə adına Naxçıvan Dövlət Musiqili Dram Teatrı, Məmməd Tağı Sidqi adına Naxçıvan Dövlət Kukla Teatrı, Naxçıvan Dövlət Uşaq Teatrı, 5 xalq teatrı tamaşaçıların mənəvi və estetik zövqlərinin formalaşmasında, onların asudə vaxtlarının mənalı təşkilində əhəmiyyətli rol oynayır.
Tədbirin bədii hissəsində Hüseyn Cavidin “Xəyyam” mənzum dramı əsasında hazırlanmış tamaşa nümayiş etdirilib. Şərq klassik poeziyasının dahilərindən olan şair-mütəfəkkir Ömər Xəyyamın həyatından bəhs edən “Xəyyam” dramı Hüseyn Cavidin dəyərli yaradıcılıq nümunələrindəndir. Tamaşada Xəyyamla yanaşı dövrünün tanınmış şəxsiyyətlərinin bədii obrazları canlandırılıb.
Cavid Səfərli