Qəhrəmanlıq zirvəsində bir ömür – Səfəralı Məmmədov
Azərbaycan torpaqlarının azadlığı, xalqımızın müstəqilliyi uğrunda canından keçən qəhrəmanlar tariximizin ən uca zirvəsində dayanırlar. Onların hər biri millətimizin şərəf salnaməsinə qızıl hərflərlə yazılıb. Azərbaycanın Milli Qəhrəmanı Səfəralı Məmmədov da bu zirvəyə ucalan igidlərimizdən biridir.
Səfəralı Qurban oğlu Məmmədov 16 oktyabr 1963-cü ildə Masallı rayonunun Sərçuvar kəndində dünyaya göz açıb. Orta təhsilini başa vurduqdan sonra, 1981-ci ildə hərbi xidmətə yollanıb. Vətənə olan sədaqəti onu ordu sıralarından sonra da xidmət yolundan ayırmadı — Rusiya Federasiyasının Krasnodar şəhərində milis orqanlarında çalışdı, daha sonra isə 1990-cı ildə Bakı Xüsusi Orta Milis Məktəbini bitirərək leytenant rütbəsi aldı.
1990-cı illərin əvvəllərində ölkəmiz ağır sınaqlardan keçir, düşmən hücumları Vətən torpaqlarını təhlükə altında qoyurdu. Məhz o dövrdə Səfəralı Məmmədov bir an belə tərəddüd etmədən döyüş yoluna atıldı. 1992-ci ilin fevralında Xocavənd rayonunun Qaradağlı kəndi uğrunda gedən qanlı döyüşlərdə o, əsl igidlik nümunəsi göstərdi. Düşmənin çoxsaylı qüvvələrinə qarşı rəşadətlə vuruşan Səfəralı Məmmədov 16 fevral 1992-ci ildə qəhrəmancasına şəhidlik zirvəsinə ucaldı.
Onun igidliyi, vətənpərvərliyi dövlət tərəfindən yüksək qiymətləndirildi — Azərbaycan Respublikası Prezidentinin 6 iyun 1992-ci il tarixli, 831 saylı fərmanı ilə mayor Səfəralı Qurban oğlu Məmmədov ölümündən sonra “Azərbaycanın Milli Qəhrəmanı” adına layiq görüldü.
Bu gün doğma Sərçuvar kəndində uyuyan qəhrəmanın xatirəsi daim ehtiramla anılır. Masallı rayonunda bir məktəb və bir küçə onun adını daşıyır.
Səfəralı Məmmədovun ömür yolu bir qəhrəmanlıq dastanı, Vətən sevgisinin ölməz rəmzidir.
Nurtac İsmayılova
Naxçıvan Dövlət Universitetinin "Jurnalistika " ixtisası üzrə
II kurs tələbəsi