Peşəyə sadiqlik və fədakarlığın səbəb olduğu ucalıq
Səma aydın olsa da, o hər kəs üçün açıq deyil. Ora yalnız cəsarəti, biliyi və iradəsi çatanlar yüksələ bilir. Pilotlar və təyyarə bələdçiləri məhz bu seçilmişlərdəndirlər. Onlar səmada təkcə təyyarəni idarə etmir. İnsan talelərini, ümidləri və həyatları da daşıyırlar. Məhz buna görə onları səma qəhrəmanları adlandırırlar. Xalqımızın tarixində belə qəhrəmanlar az olmayıb. Təlim uçuşlarında, döyüş tapşırıqlarında, mülki təyyarə qəzasında həlak olan qəhrəmanların adları da tariximizin səhifələrinə yazılıb.
25 dekabr 2024-cü il… AZAL-a məxsus sərnişin təyyarəsinin Qazaxıstanın Aktau şəhəri yaxınlığında qəzaya uğradığı o məşum hadisədən düz bir il ötür. Həmin gün Aktau səmasında baş verən təyyarə qəzası Azərbaycan Aviasiya tarixinin ən ağırlı səhifələrindən biri olmaqla yanaşı əsl qəhrəmanlığın nə demək olduğunu bizə göstərdi. Həmin faciəli uçuşda “ Embraer 190”tipli sərnişin təyyarəsində insan talelərini çiyinlərində daşıyan pilotlarımız İqor Kşinyakin, Aleksandr Kalyaninov və təyyarə bələdçisi Hökumə Əliyeva ölümün qarşısından geri çəkilməyərək peşə andlarına son nəfəslərinədək sadiq qaldılar. Pilotlar son ana qədər təyyarəni idarə etmək , sərnişinlər üçün mümkün olanı etmək yolunu seçdilər. Təyyarənin salonunda isə Hökumə Əliyeva öz sakitliyi və mərdliyi ilə insanların ümidi oldu. O an təşviş,qorxu içində olan insanlara onun səsi dayaq, güvən oldu. Son dəqiqələrinə qədər sərnişinləri sakitləşdirməyə çalışan Azərbaycanın Milli Qəhrəmanı Hökumə Əliyevanın “Hamı kəmərlərini bağlasın, hörmətli sərnişinlər, təlimata uyğun hərəkət edin. Hər şey yaxşı olacaq!”sözləri təyyarədə olanlara yaşamaq gücü verdi. Saatlarla havada qalan təyyarədə onun ümid dolu bu sözləri böyükdən-kiçiyə hər kəsin yaddaşına əbədi həkk olundu. Beləcə həyat ölümə qalib gəldi. Həyatın ən çətin anlarında başqalarını düşünmək qəhrəmanlığın ən uca məqamı oldu. Onlar öz həyatları bahasına təyyarədə olan 67 nəfərdən 29-na yaşamaq şansı verdilər. Prezident İlham Əliyevin sərəncamı ilə həlak olan ekipaj üzvləri İqor Kşnyakin, Aleksandr Kalyaninov və Hökumə Əliyevaya ölümündən sonra Azərbaycanın Milli qəhrəmanı adı verilib. Onların xatirələri həm vətənimizdə, həm də onun hüdudlarındann kənarda əbədiləşdirlib.
O qəza bir daha sübut etdi ki, qəhrəmanlıq təkcə döyüş meydanında olmur. Qəhrəmanlıq bəzən səmada, metal gövdəli bir təyyarənin içində, çıxış yolu azlan , ümidlər itən anlarda doğulur. Qəhrəman pilotlarımız və təyyarə bələdçisi Hökumə Əliyeva məhz belə bir məqamda o qəhrəmanlığı etdilər. Bu səbəbdən onların adları səma qədər ucalarda dayanır. Nə qədər zaman keçsə də xalqımız o hadisəinin, o günün kədər və qürurunu hər daim xatırlayacaq.
Türkanə Əmoyeva
Naxçıvan televiziyasının redaktoru