“Naxçıvan” Universitetində soyqırım qurbanlarının xatirəsi anılıb
NUHÇIXAN xəbər verir ki, “Naxçıvan” Universitetində 31 Mart-Azərbaycanlıların Soyqırımı Günü ilə əlaqədar “Azərbaycanlılara qarşı törədilmiş soyqırımların səbəb, nəticə və ibrət dərsləri” mövzusunda Ümumi tarix kafedrasının təşkilatçılığı ilə elmi konfrans keçirilib.
Konfransda əvvəlcə soyqırım faciəsi qurbanlarının, torpaqlarımızın azadlığı və dövlət müstəqilliyimizin qorunması uğrunda canlarını fəda etmiş soydaşlarımızın əziz xatirələri bir dəqiqəlik sükutla yad edilib.
Konfransda ali təhsil ocağının rektoru İsmayıl Əliyev ermənilərin xalqımıza qarşı törətdikləri soyqırım aktının acı nəticələrindən və 70 illik Sovet imperiyası rejiminin tarixi cinayətin ört-basdır edilməsi üçün həyata keçirdiyi məkrli siyasətdən danışıb.
Sonra tarix üzrə fəlsəfə doktoru Elçin Zamanovun “XX əsrin əvvəllərində Zaqafqaziyada yeni tarixi mərhələnin başlanğıcı:Türk müsəlmanlara qarşı həyata keçirilən soyqırımların tarixi kontekstdə təhlili” mövzusunda çıxışı dinlənilib.
Sonda konfrans iştirakçıları 31 Mart-Azərbaycanlıların Soyqırımı Günü ilə bağlı videoçarxa baxıblar.
Seyfur Hacımuradov