Qısa ömür, əbədi şərəf: Milli Qəhrəman Şamil Ramazanov
Vətən bəzən insanı seçir. Onun taleyinə adını tarixə yazmaq, ömrünü isə torpağa əmanət etmək düşür. Azərbaycanın Milli Qəhrəmanı Şamil Ağasəf oğlu Ramazanov da məhz belə talelilərdən idi.
Şamil Ramazanov 1976-cı il yanvarın 19-da Ağsu rayonunun tanınmış Rəhimli kəndində dünyaya göz açıb. İlk təhsilini də doğma kəndində alıb. Gənc yaşlarından Vətənə bağlılığı ilə seçilən Şamil üçün bu yol taleyin çağırışı idi. 1994-cü ilin martında o, Azərbaycan Milli Ordusunun sıralarına qoşuldu.
Gəncə şəhərində keçdiyi hərbi hazırlıq dövründə müxtəlif növ silahlardan peşəkar şəkildə istifadə etməyi öyrəndi. Silah onun əlində sadəcə döyüş vasitəsi deyil, torpağın, dövlətçiliyin və xalqın müdafiə rəmzinə çevrilmişdi. İntizamı, cəsarəti və məsuliyyəti ilə komandirlərinin etimadını qazanan Şamil Ramazanov üzərinə düşən bütün tapşırıqları yüksək dəqiqlik və sədaqətlə yerinə yetirirdi.
1995-ci ilin mart ayı ölkə üçün həlledici və sınaq dolu günlər idi. Dövlətçiliyin taleyinin həll olunduğu həmin ağır məqamlarda Şamil Ramazanov tərəddüd etmədi. O, Vətəni canından üstün tutanların sırasında yer aldı.
17 mart 1995-ci ildə döyüş tapşırığını yerinə yetirərkən aldığı ağır yaralar gənc qəhrəmanın ömrünü yarımçıq qoydu. Lakin bu yarımçıq qalan ömür əbədiyyət qazandı. Şamil Ramazanov təkcə şəhidlik zirvəsinə ucalmadı, eyni zamanda xalqın yaddaşında əbədi iz buraxdı.
Onun göstərdiyi igidlik dövlət tərəfindən yüksək qiymətləndirildi və Azərbaycan Respublikası Prezidentinin 4 aprel 1995-ci il tarixli fərmanı ilə Şamil Ramazanov “Azərbaycanın Milli Qəhrəmanı” fəxriadına layiq görüldü.
Şamil Ramazanov qısa, lakin şərəfli ömrünü Vətən yolunda fəda etdi. Vətən üçün canından keçənlərin adı zamanla silinmir — zaman onların adını müqəddəsləşdirir. Şamil Ramazanov da bu müqəddəs adlardan biridir.
Nurtac İsmayılova