Cəsarət o silahda deyil, onu daşıyan ürəkdədir
“ŞƏHİD” anlayışı müqəddəs bir zirvədir. Onların ölümü torpağa yox, əbədiyyətə qovuşmaqdır. Xalqın təhlükəsizliyi, dövlətçiliyimizin qorunması naminə daima ön sıralarda dayanan Azərbaycan polisi arasında da torpaq üçün canından keçən igidlər zaman -zaman var olub. Onlardan biri də Azərbaycan Milli Qəhrəmanı Məhərrəm Seyidovdur.
7 sentyabr 1952-ci ildə Şərur rayonun Alışar kəndində, zəhmətkeş bir ailədə dünyaya gələn Məhərrəm Seyidov tanrının ona bəxş etdiyi bu işıqlı dünyada cəmi 37 il yaşadı. Sonralar bu ömür yolu bütöv bir xalqın qürur və iftixar tarixçəsinə döndü. Azərbaycanın ilk milli qəhrəmanı, dörd bacının bir qardaşı olan bu mərd oğul elə uşaqlıqdan dostluqda sədaqətli, cəsur idi.
Nə qədər sakit təbiətli olsa da bir o qədər də üsyankar bir ürəyə sahib olan Məhhərəm Seyidov hərbi xidmətini Xerson şəhərində başa vurduqdan sonra uşaqlıqdan bəri arzuladığı polis peşəsinə yiyələnir. 1970-ci ildən Daxili İşlər Orqanlarında çalışır. Şərur, Şahbuz və Ordubad rayonlarında xidmət edir. Xidməti dövründə hər zaman seçilir və fəaliyyəti yüksək qiymətləndirilir. 1980-cı ildə Moskvada ictimai asayişin mühafizəsində fərqləndiyinə görə mükafatlandırılır. Onun polis andına sədaqəti, peşəyə olan sevgisi özünü Azərbaycan xalqının azadlıq mübarizəsində - 20 Yanvar hadisələrində də göstərdi. Həmin hadisələr ərəfəsində , 1990-cı ilin yanvar ayının 16-dan erməni silahlı birləşmələri Kərki kəndində azğın əməllərinə başlayanda təhlükə barədə Şərur rayon Daxili İşlər Şöbəsinə məlumat daxil olur. Hadisə yerinə göndərilən onlarla polis əməkdaşı arasında Məhərrəm Seyidov da olur.
O, Kərki uğrunda gedən döyüşlərdə iştirak edir. Yanvarın 18-də Sədərəyə yaxın postlarda gedən qanlı döyüşlərdə Sədərəyin müdafiəsi təmin olunsa da, ölən və yaralananlar olur. Məhərrəmin döyüş yoldaşlarından kapitan Azər Seyidov mühasirəyə düşür. Güllə yağışının altında özünü döyüş yoldaşına çatdıran Məhhərəm Seyidov onu mühasirədən çıxarsa da özü ağır yaralanır və yanvarın 19-da şəhid olur.
Bir qərinədən əvvəl yazılan o hadisələrdə hər qəhrəman layiqli yerini tutdu. Son nəfəsinədək elinin, obasının keşiyində duran, onun qeyrətini çəkən, ağır yaralanan döyüş yoldaşlarının imdadına çatan Məhərrəm Seyidov da şəhadətindən sonra “Azərbaycanın Millli qəhrəmanı” adına layiq görülən ilk şəhidlərdən olur.
Hər səhər günəşin şəfəqləri Tejqar dağının sərt qayalarını yarıb keçəndə dağlar o igidlərin hekayələrini danışır. Sədərəyin dağları şəhidlərin qanından qırmızı rəngə boyansa da qeyrət qalası kimi qorundu. Sədərəyə “Qeyrət qalası” ifadəsini isə Məhərrəm Seyidov kimi oğullar qazandırdı. Deyilənə görə akademik Budaq Budaqov o zamanılar Ermənistan SSRİ-nin Siddi kəndində yaşayan soydaşlarımızla görüşə gedəndə onun təhlükəsizliyini qorumaq Məhərrəm Seyidovun öhdəliyinə düşüb. Budaq Budaqov ona “bir tapança ilə məni necə qoruyacaqsan?” deyəndə- cavabında “Cəsarət o tapançada deyil, onu daşıyandadır” deyir. Elə buna görə də, onun ölməz adı gələcək nəsillərə mərdliyin, cəsarətin və vətənpərliyin simvolu kimi qalıb.
Türkanə Əmoyeva
Naxçıvan televiziyasının redaktoru