Əlahiddə Ümumqoşun Orduda gənc əsgərlər ixtisas hazırlığı kurslarını uğurla bitiriblər - FOTOLAR

Əlahiddə Ümumqoşun Ordunun mətbuat xidmətindən NUHÇIXAN-a verilən məlumata görə yanvar  ayı ərzində həqiqi hərbi xidmətə çağırılmış gənc əsgərlər təşkil edilmiş ixtisas hazırlığı kurslarını uğurla bitiriblər. Bu münasibətlə gənc əsgərlərin  ixtisas hazırlığı kurslarının başa çatması münasibəti ilə növbəti tədbir keçirilib.

Zabit, əsgər və valideynlər adından  çıxış edənlər kurslarda fəallıq göstərərək yenilməz döyüşçü keyfiyyətlərinə yiyələnən gənclərə xidmətlərində uğurlar arzulayıblar.

Vurğulanıb ki,  Azərbaycan ordusunun sıraları həmişə  yüksək döyüş hazırlığına malik oğullarla möhkəmlənir. Bugünkü  əsgərlər də yeri gələrsə  üçüncü ildönümünü qeyd etdiyimiz Aprel döyüşlərində və Günnüt qələbəsi zamanı rəşadət göstərən igid oğullarımızın yolu ilə gedərək bir an belə tərəddüd etmədən vətən uğrunda qəhrəmanlıq göstərəcəklər.

İxtisas hazırlığı kursunu başa vurmuş əsgərlər rabitə vasitələri ilə fəaliyyəti, fiziki hazırlıq üzrə silahsız və silahlı çalışmalar kompleksini, müxtəlif atıcı silahların gözübağlı vəziyyətdə natamam sökülüb yığılmasını, minaatan qurğuların döyüşə və səfər vəziyyətinə gətirilməsini, mina sahəsinin qurulmasını və keçidlərin açılmasını nümayiş etdiriblər.

Ən yaxşı tabor, bölük və taqım adına layiq görülən bölmələrə keçici bayraqlar təqdim edilib. Nümunəvi xidməti ilə fərqlənən hərbi qulluqçular mükafatlandırılıblar.

Bölmələrin tribuna önündən təntənəli keçidindən sonra “Əsgər marşı” ifa edilib və ixtisas hazırlığı kurslarını uğurla bitirmiş əsgərlər növbəti xidmət yerlərinə yola salınıblar.