Naxçıvanda tələbə rəssamlar arasında “Art Battle” yarışı başlayıb - FOTOLAR
NUHÇIXAN xəbər verir ki, Naxçıvan Muxtar Respublikasında fəaliyyət göstərən ali və orta ixtisas təhsili müəssisələrinin tələbələri arasında “Art Battle”- I “İncəsənət Döyüşü” İncəsənət yarışı keçirilib.
Naxçıvan Muxtar Respublikasının Rəssamlar Birliyi, Gənclər və İdman Nazirliyi və Naxçıvan Muxtar Respublikasının Gənclər Fondunun birgə təşkil etdiyi yarışın keçirilməsində məqsəd gənc istedadların tanıdılması və onlar arasında sağlam rəqabətin formalaşdırılmasıdır. Müsabiqəyə Naxçıvan Muxtar Respublikası Rəssamlar Birliyinin hamiliyinə verilmiş Naxçıvan Dövlət Universitetinin və Naxçıvan Müəllimlər İnstitutunun Təsviri İncəsənət və Rəngkarlıq ixtisasında təhsil alan tələbələr və müsabiqələrdə iştirak edən istedadlı gənclər dəvət olunub.
Bəhruz Kəngərli adına Rəssamlar parkında təşkil edilən yarış başlanmazdan əvvəl Naxçıvan Muxtar Respublikası Rəssamlar Birliyinin sədri Ülviyyə Həmzəyeva, Gənclər Fondunun icraçı direktoru Cəbi Quliyev və Gənclər və İdman Nazirliyinin əməkdaşı Tahir Məmmədli çıxış edərək yarışın keçirilməsinin məqsəd və mahiyyətindən danışaraq iştirakçılara uğurlar arzu ediblər.
Yarışda iştirak edən hər gənc digərinə səs verərək qalibi müəyyənləşdirəcək. 20 gənc rəssamın iştirakı ilə keçirilən yarışın qalibləri sabah Naxçıvan Muxtar Respublikası Rəssamlar Birliyinin Bəhruz Kəngərli adına sərgi salonunda təşkil olunan yekun tədbirində mükafatlandırılacaq.
Vüsal Muradov