Naxçıvan Muxtar Respublikası Atıcılıq Federasiyasının iclası keçirilib

NUHÇIXAN xəbər verir ki, Naxçıvan Muxtar Respublikası Atıcılıq Federasiyasında keçirilən iclasda Federasiyanın sədri Səhət Həbibbəyli ümumi fəaliyyət barədə məlumat verib. Qeyd edilib ki,   Atıcılıq və Atıcılıq Əyləncə Mərkəzlərində yenidənqurma və bərpa işləri aparılıb, lazımi avadanlıqlarla təchiz olunaraq əhalinin istifadəsinə verilib. “Hədəf” və “Qələbə” atıcılıq klublarının heyəti formalaşdırılır, o cümlədən bölgələrdə yeni klublar, atıcılıq bölmələri və peyntbol meydançalarının yaradılması ilə bağlı işlər nəzərdə tutulub. Federasiya sədri bildirib ki, bu sahədə kütləviliyin təmin olunması, əhalinin xüsusən də yeniyetmə və gənc nəslin atıcılığa marağının artırılması, eləcə də atıcılıq idman növlərində yığma komandanın formalaşdırılması istiqamətində addımlar atılır. Bunların davamı kimi gələcəkdə bacarıqlı və ümidverici idmançıların ölkə və beynəxalq miqyaslı yarışlarda iştirakı və onların hazırlıq səviyyəsinin yüksəldilməsi məqsədilə təlim məşq toplanışlarının, ustad dərslərinin keçirilməsi də təmin olunacaq.

İclas zamanı iştirakçıların səs çoxluğu ilə Kazım Cabbarov federasiyanın sədr müavini seçilib.

Kazım Cabbarov federasiya sədrinə və üzvlərə minnətdarlıq edərək Atıcılıq idman növlərinin inkişafı istiqamətində öz vəzifə öhdəliklərini layiqincə yerinə yetirəcəyinə söz verib.

Sonra cari il üçün tərtib olunan tədbirlər planı təsdiq olunub.

Gənclər və İdman Nazirliyinin şöbə müdiri Taleh İbrahimov Federasiya ilə əməkdaşlıqlarının bundan sonra da səmərəli şəkildə davam etdiriləcəyini, idman yarışlarının təşkili və digər təşkilati işlərdə birgə fəaliyyət göstərəcəklərini vurğulayıb. 

 Federasiyanın sədri Səhət Həbibbəyli Naxçıvan Muxtar Respublikası Ali Məclisinin Sədrinə minnətdalıq edərək bildirib ki, göstərilən etimadı doğruldaraq qarşıya qoyulan tapşırıqların icrası istiqamətində əməli işlər görüləcək, lazımi addımlar atılacaq.

İclas qarşıda görüləcək işlərin müzakirəsi ilə sona çatıb.

Emil Səmədov