Şahbuz məktəbliləri “Cırtdanın yeni sərgüzəşti”nə baxıblar
NUHÇIXAN xəbər verir ki, M.T.Sidqi adına Naxçıvan Dövlət Kukla Teatrı Şahbuz Rayon Mədəniyyət Sarayında uşaq və məktəblilər üçün tamaşa oynayıb. Kollektiv yazıçı Bayram İsgəndərlinin “Cırtdanın yeni sərgüzəşti” əsərini təqdim edib.
Yazıçı-dramaturq Bayram İsgəndərlinin Azərbaycan xalq nağılı əsasında yazdığı “Cırtdanın yeni sərgüzəştləri” tamaşasının əsas qəhrəmanı yenə də uşaqların sevdiyi Cırtdandır. Cırtdan balaca olsa da öz ağlı və hazırcavablığı ilə Divə qalib gələrək dostlarını xilas edir. Tamaşada hadisələr Cırtdanın və onun dostlarının başına gələn sərgüzəştlər üzərində qurulub.
Tamaşada Cırtdan, Div, Murad, Gürşad, Gürhan, Bərşad, Canavar obrazlarını teatrın aktyorları Ləman Əhmədova, Əfqanə Ələsgərova, Ulduz Süleymanova, Süleyman Süleymanov, Vəsmə Quliyeva, Arzu Səfərov, İlqar Babayev və başqaları canlandırırlar.
Tamaşanın quruluşçu rejissoru Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Ədalət Quliyev, bəstəkarı Əli Məmmədovdur.
Əli Rzayev