BMT rəsmisi WUF13-ə uğurlu ev sahibliyinə görə Azərbaycanı təbrik edib

Bu qədər qarışıq və çətin bir dünyada Azərbaycan vacib məsələləri ön plana çıxarmağın nümunəsini göstərir: yaşıl inkişafı prioritet etmək, dayanıqlı şəhərləri önə çəkmək və özümüzün, eləcə də övladlarımızın gələcəyi ilə bağlı məlumatlı qərarlar qəbul etməyimizi təmin etmək. Ümumdünya Şəhərsalma Forumu (WUF13) həqiqətən çox mühüm təşəbbüsdür və mənə deyildiyi kimi, bu tarixdə keçirilən ən böyük sessiyadır. Mən bu fürsətdən istifadə edərək, WUF13-ün uğurlu təşkilinə görə Azərbaycanı bir daha təbrik etmək istəyirəm.

NUHÇIXAN xəbər verir ki, bunu BMT-nin Avropa İqtisadi Komissiyasının (UNECE) icraçı katibinin müavini Dmitri Mariyasin BMT-nin Ümumdünya Şəhərsalma Forumunun (WUF13) çərçivəsində keçirilən “Şəhərsalmada iqlim hədəflərinə nail olmaq üçün Strateji Ətraf Mühitin Qiymətləndirilməsi vasitə kimi” adlı tədbirdə çıxış edərkən deyib.

O, Strateji Ekoloji Qiymətləndirmə mövzusunun mediada kifayət qədər işıqlandırılmadığını qeyd edib: “Halbuki bu, gələcəklə, rəqabət qabiliyyəti ilə bağlıdır. Bu, ölkəyə uzunmüddətli sabitlik gətirən düzgün seçimlərin edilməsindən bəhs edir və məhz bu dəyərləri biz burada təşviq etməyə çalışırıq”.

“Şəhərsalma planlaşdırılmasında Strateji Ekoloji Qiymətləndirmənin rolu xüsusilə aktual və vacibdir. Xüsusən də ölkələrin sürətlə urbanizasiya etdiyi, iqtisadiyyatlarını inkişaf etdirdiyi, demoqrafik dəyişiklikləri idarə etdiyi və eyni zamanda iqlim dəyişikliyinin nəticələri ilə mübarizə apararaq iqlim öhdəliklərini yerinə yetirməyə çalışdığı bir dövrdə bu məsələ daha böyük əhəmiyyət daşıyır”.