Oftalmoloq alimin doğum günü adını daşıyan məktəbdə qeyd edilib - FOTOLAR

NUHÇIXAN xəbər verir ki, Akademik Zərifə Əliyeva adına Şahtaxtı kənd tam orta məktəbində görkəmli oftalmoloq-alim, akademik Zərifə xanım Əliyevanın anadan olmasının 96-cı ildönümü münasibətilə tədbir keçirilib.

İştirakçılar əvvəlcə akademik Zərifə Əliyevanın  məktəbin foyesindəki büstü önünə gül dəstələri qoyub, adını daşıyan muzeyə baxıblar.

Tədbirdə Kəngərli Rayon İcra Hakimiyyəti başçısının müavini Səriyyə Qurbanova dünya şöhrətli alimin Azərbaycan tibb elminin inkişafındakı fəaliyyətindən və oftalmologiya sahəsində qazandığı nailiyyətlərdən danışıb.

Kəngərli Rayon Təhsil Şöbəsinin müdiri Emin Məmmədxanlı və Akademik Zərifə Əliyeva adına Şahtaxtı kənd tam orta məktəbinin direktoru Etimad Məmmədov görkəmli alimin keçdiyi həyat yoluna nəzər salıb, onun yüksək ixtisaslı tibb kadrlarının hazırlanmasında və göz xəstəliklərinin müalicəsində göstərdiyi misilsiz xidmətlərdən danışıblar. 

Məktəbin şagirdləri tərəfindən Zərifə xanım Əliyevaya həsr olunan şeirlər səsləndiriblər. Sonda dünya şöhrətli oftalmoloqun  həyat və fəaliyyəti ilə bağlı film nümayiş olunub.