Akademik Zərifə Əliyevanın 96 illiyi Naxçıvan Şəhər Poliklinikasında qeyd edilib - FOTOLAR

NUHÇIXAN xəbər verir ki, Zərifə Əliyevanın adını daşıyan Naxçıvan Şəhər Poliklinikasında görkəmli oftalmoloqun anadan olmasının 96-cı ildönümü    münasibətilə tədbir olub

Tədbir iştirakçıları əvvəlcə poliklinikanın foyesində Zərifə xanım Əliyevanın büstü önünə gül qoyub və görkəmli alimin həyat və fəaliyyətini əks etdirən sərgiyə baxıblar. 

Sonra poliklinikanın iclas zalında keçirilən tədbiri Naxçıvan Muxtar Respublikası səhiyyə naziri Niyazi Novruzov açaraq  görkəmli akademik Zərifə Əliyevanın çoxşaxəli həyat yolundan, xalqımız qarşısında göstərdiyi böyük xidmətlərdən danışıb.

Sonra Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Surə Seyid və  Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova Zərifə xanımın  fədakar ana, vəfalı həyat yoldaşı  və görkəmli elm xadimi, əsl Azərbaycan qadını  kimi gördüyü işlərdən söz açıblar.

Tədbir iştirakçıları görkəmli oftalmoloq-alimin mənalı ömür yolunu əks etdirən videoçarxa baxıblar. Naxçıvan Qızlar Liseyinin şagirdləri görkəmli alimə həsr olunmuş şeirləri bədii qiraət ediblər.

Sonra Naxçıvan Şəhər Poliklinikasının baş həkimi və poliklinikanın bir qrup həkimi Naxçıvan şəhərindəki Körpələr Evi və Ailələrə Dəstək Mərkəzində xüsusi qayğıya ehtiyacı olan uşaqlara baş çəkiblər.

                                                                    Xanım Rüstəmzadə