Şahmat yarışında bu qrup daha çox diqqətdədir

“Bizim  diqqətimizdə  bu gün “Naxçıvan 2019 ” şahmat festivalında “C” qrupunda yarışan uşaq və yeniyetmələr daha çox dayanır.  Çünki bu qrupda  bizim gələcəyimiz, Azərbaycan şahmatının sabahı var”- NUHÇIXAN-ın verdiyi xəbərə görə, bu sözləri  Naxçıvanda keçirilən mötəbər şahmat festivalında turnirin baş hakimi Faiq Həsənov deyib.

Baş hakim  qeyd edib ki, qrupda yeniyetmə şahmatçıların sayı ilbəil artır. “Təsəvvür edin ki, Naxçıvan Şahmat Mərkəzinin iki mərtəbəsindəki zalların hamısı dolub. Yer yoxdur. İlk dəfədir ki, bu qrupda  196 idmançı iştirak edir. İndiyədək qrupda uzağı 140- 145 şahmatçı olub. Baxırıq ki, onların sayı  get-gedə artır, bu nə deməkdir? O deməkdir ki, Azərbaycanda şahmat get-gedə populyarlaşır. Azərbaycan şahmatı inkişaf edir. Bu uşaqların yaxın gələcəkdə adlarını yəqin ki, ən mötəbər yarışlardan eşidəcəyik”.

Qeyd edək ki, may ayının 1-dən 10-dək Naxçıvan Şahmat Mərkəzində Ümummilli lider Heydər Əliyevin anadan olmasının 96 illiyinə həsr edilən beynəlxalq “Naxçıvan 2019” şahmat festivalı keçirilir. Sayca 9-cu olan Festivala dünyanın 14 ölkəsindən 350-dən artıq şahmatçı qoşulub. İlk dəfə olaraq Azərbaycan,  Belarusiya, Türkiyə, Rusiya, İran, Gürcüstan, Yunanıstan, Belçika, Hindistan, Qazaxıstan, Özbəkistan, Ukrayna, Latviya respublikaları ilə yanaşı Amerika Birləşmiş Ştatlarını təmsil edən idmançı da qatılıb.