Yanvar-aprel aylarında əlilliyi olan şəxslər 10 min 135 reabilitasiya vasitəsi ilə təmin ediliblər

Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzi cari ilin yanvar-aprel aylarında 3691 əlilliyi olan şəxsə protez-ortopedik bərpa xidmətləri göstərib.

Nazirliyin ictimaiyyətlə əlaqələr və kommunikasiya şöbəsindən NUHÇIXAN-a bildiriblər ki, onlardan 425 nəfəri ölkəmizin ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi olan şəxslərdir.

Həmin müddət ərzində mərkəz əlilliyi olan şəxslərə 470 əlil arabası, 356 aşağı və yuxarı ətraf, habelə döş protezi, 389 aşağı və yuxarı ətraf ortezi, 2273 müxtəlif reabilitasiya vasitəsi, bel və boyun nahiyəsi üçün 91 korset, 516 cüt protez ayaqqabı, 1925 cüt ortopedik ayaqqabı, 312 dördayaqlı dayaq vasitəsi verib. Əlilliyi olan şəxslər, həmçinin 914 qoltuqaltı və dirsəkaltı ağac, 524 ədəd əsa və s. reabilitasiya vasitələri ilə təmin ediliblər.

Ümumilikdə, bu ilin yanvar-aprel aylarında Protez-Ortopedik Bərpa Mərkəzi əlilliyi olan şəxslərə 10 min 135 reabilitasiya vasitəsi verib, 256 nəfərə isə stasionar şəraitdə reabilitasiya xidmətləri göstərib.