Sosial könüllülər tənha ahılları ziyarət ediblər - FOTOLAR

Nazirliyin mətbuat xidmətindən NUHÇIXAN-a verilən məlumata görə, Naxçıvan Muxtar Respublikası Əmək və Əhalinin Sosial Müdafiəsi Nazirliyinin və Naxçıvan Muxtar Respublikası Gənclər Fondunun birgə təşkilatçılığı ilə  Şahbuz rayonunda  sosial xidmət göstərilən tənha ahılların evlərinə sosial könüllülərin ziyarətləri təşkil olunub.

Sosial Könüllülük Akademiyasının ilk məzunları ahıllara göstərilən xidmətlərlə tanış olub, yaşayış sahələrində təmizlik və abadlıq işlərinin aparılmasında köməklik göstəriblər. Eyni zamanda,  tənha ahıllara sovqatlar da təqdim olunub. Ahıl vətəndaşlar onlara göstərilən diqqət və qayğıya görə minnətdarlıqlarını bildiriblər.

Qeyd edək ki, bu kimi tədbirlərin keçirilməsində əsas məqsəd gənclərin  tənha ahıllara göstərilən sosial xidmətlərlə tanışlığı,  sosial xidmət sahələrində könüllülük  fəaliyyətinin genişlənməsinin  təşviqi, tənhalarda  yarana  biləcək diskriminasiya (ayrıseçkilik) hallarının qarşısının alınması, habelə onların sosial  inteqrasiyasına  nail olunmasından ibarətdir.