YENİ AZƏRBAYCAN PARTİYASININ ÜZVÜ OLAN NAXÇIVANLI GƏNCLƏR “HEYDƏR ƏLİYEV MƏKTƏBİ”NDƏ İŞTİRAK EDİBLƏR - FOTOLAR
NUHÇIXAN xəbər verir ki, Yeni Azərbaycan Partiyasının Mərkəzi Aparatının təşəbbüsü ilə təşkil olunan “Heydər Əliyev məktəbi” yay məktəbi layihəsi gənclərin maarifləndirilməsi, bilik və bacarıqlarının inkişaf etdirilməsi istiqamətində növbəti uğurlu addım olub. Layihənin ilk iki mərhələsi müvafiq olaraq Gəncə və İsmayıllıda keçirildikdən sonra üçüncü mərhələ Yeni Azərbaycan Partiyasının Naxçıvan Muxtar Respublikasındakı yerli təşkilatlarını təmsil edən fəal gənclərin iştirakı ilə baş tutub.
29 iyul – 3 avqust 2026-cı il tarixlərində YAP Mərkəzi Aparatı və YAP Naxçıvan şəhər təşkilatının birgə təşkilatçılığı ilə Gəncə şəhərində keçirilən altı günlük proqram uğurla yekunlaşıb. Layihəyə Naxçıvan Muxtar Respublikasının 8 yerli partiya təşkilatını təmsil edən 62 nəfər gənc qatılıb. İştirakçılar arasında ərazi partiya təşkilatlarının gənc sədrləri, sosial media fəalları və 30 yaşadək partiya üzvləri üstünlük təşkil edib.
YAP Naxçıvan şəhər təşkilatının sədri Elman Cəfərlinin rəhbərliyi ilə layihəyə qoşulan gənclər proqram çərçivəsində müxtəlif mövzularda təşkil olunan müzakirələrdə fəal iştirak ediblər. Tədbirlərdə YAP İdarə Heyətinin üzvləri, Mərkəzi Aparatın məsul əməkdaşları, Milli Məclisin deputatları, Gəncə Şəhər İcra Hakimiyyətinin rəhbərliyi, YAP Gəncə şəhər təşkilatının nümayəndələri, eləcə də tanınmış elm, təhsil, media və ictimai-siyasi xadimlər çıxış ediblər. “Heydər Əliyev və müstəqil Azərbaycanın ideoloji əsasları”, “Dövlət gənclər siyasəti”, “Böyük Qayıdış konsepsiyası və Azərbaycanın gələcək inkişaf strategiyası”, həmçinin “Memar Əcəmi irsi: milli memarlıq üslubunun formalaşması və inkişafı” mövzularında keçirilən diskussiyalar iştirakçılar tərəfindən böyük maraqla qarşılanıb.
Layihə yalnız nəzəri biliklərin əldə olunması ilə məhdudlaşmayıb. Gənclər üçün təşkil edilən interaktiv təlimlər, intellektual oyunlar, idman yarışları və istedad gecələri onların komanda ruhunun, liderlik keyfiyyətlərinin və ünsiyyət bacarıqlarının inkişafına töhfə verib. Xüsusi maraq doğuran “Gələcəyin şəhəri: Maketini qur!” adlı workshop zamanı iştirakçılar ekologiya, innovasiya və müasir şəhərsalma prinsiplərini əsas götürərək gələcəyin şəhər modelini hazırlayıb, yaradıcı yanaşmalarını nümayiş etdiriblər. Fərqlənən komandalar kubok və diplomlarla təltif olunublar.
Yay məktəbinin ən yaddaqalan məqamlarından biri iştirakçıların Gəncə şəhərinin tarixi-mədəni abidələrinə, Göygöl Milli Parkına və işğaldan azad edilmiş ərazilərə təşkil olunan ekskursiyaları olub. Layihə iştirakçılarının böyük əksəriyyəti ilk dəfə Ağdam, Xankəndi, Şuşa və Laçına səfər edərək erməni vandalizminin nəticələrini öz gözləri ilə görüb, eyni zamanda həmin ərazilərdə həyata keçirilən genişmiqyaslı bərpa və quruculuq işləri ilə yaxından tanış olublar. Bu səfərlər gənclərdə böyük qürur hissi yaradıb və onlarda Azərbaycanın gələcəyinə inamı daha da möhkəmləndirib.
Avqustun 3-də layihənin bağlanış mərasimi keçirilib və bütün iştirakçılara sertifikatlar təqdim olunub. Çıxış edən gənclər yay məktəbinin yüksək səviyyədə təşkilinə görə Azərbaycan Respublikasının Prezidenti, Yeni Azərbaycan Partiyasının Sədri İlham Əliyevə, eləcə də layihənin təşkilatçılarına təşəkkürlərini bildiriblər. Mərasimin ardından iştirakçılar Gəncədən Bakıya, daha sonra isə Naxçıvana yola düşüblər.
Ümumilikdə, “Heydər Əliyev məktəbi” layihəsi gənclərin dövlətçilik ənənələrinə bağlılığının möhkəmləndirilməsi, Heydər Əliyev irsinin dərindən öyrənilməsi, ictimai-siyasi biliklərinin zənginləşdirilməsi və şəxsi inkişaflarının dəstəklənməsi baxımından mühüm əhəmiyyət daşıyıb. Layihə iştirakçıları həm yeni bilik və təcrübə qazanıb, həm də müxtəlif bölgələrdən olan yaşıdları ilə əməkdaşlıq və dostluq əlaqələri quraraq gələcək fəaliyyətləri üçün dəyərli təcrübə əldə ediblər. Bu baxımdan “Heydər Əliyev məktəbi” yay məktəbi Naxçıvan gənclərinin intellektual və vətəndaşlıq inkişafına mühüm töhfə verən uğurlu layihə kimi yadda qalıb.