Hərbi Liseydə konsert təşkil olunub - FOTOLAR

NUHÇIXAN xəbər verir ki, Heydər Əliyev adına Hərbi Lisey və Heydər Əliyev Uşaq-Gənclər Yaradıcılıq Mərkəzinin birgə təşkilatçılığı ilə konsert proqramı  keçirilib. "Dərsdən sonra" layihəsi əsasında Hərbi Liseydə təşkil olunan konsertdə əvvəlcə layihə haqqında məlumat verilib. Qeyd edilib ki, layihə Naxçıvan Muxtar Respublikası Təhsil Nazirliyi və Naxçıvan Muxtar Respublikası Dövlət Televiziya və Radio Verilişləri Komitəsinin birgə təşkilatçılığı ilə hazırlanıb. Məqsəd şagirdlərin asudə vaxtlarını səmərəli təşkil etməklə yanaşı, muxtar respublikanın ümumtəhsil məktəblərində xüsusi istedada və yaradıcılıq qabiliyyətinə malik yeniyetmələri aşkar etməkdir. Həmçinin qarşılıqlı əlaqə quraraq onlarda yaradıcılıq işlərinə maraq oyatmaq, bədii özfəaliyyət kollektivlərində istedadlı şagirdlərin iştirakını təşkil etmək, milli ruhda böyütmək və vətənpərvərlik hissləri aşılamaqdır.

Sonra konsert proqramı olub. Liseyin bacarıqlı və istedadlı kursantları və dərnək üzvləri vətənpərvər ruhda mahnılar oxuyub və rəqs ifa ediblər.   

Liseyin kursantlarının nümayiş etdirdiyi "Əlbəyaxa döyüş səhnəsi" və "Günnüt əməliyyatı" döyüş səhnəsi alqışlarla qarşılanıb.

Sonda Heydər Əliyev adına Hərbi Liseyin rəisi polkovnik Məhəmməd Həsənov fəal iştirak edən kursant və  dərnək üzvlərinə diplomlar təqdim edib, uğurlar arzulayıb.

Nurlan Sadiqov