“Naxçıvan” Universitetində konfrans olub
“Naxçıvan” Universitetindən NUHÇIXAN-a verilən məlumata görə, ali məktəbdə 2018-2019-cu tədris ilində Tələbə Elmi Cəmiyyətinin (TEC) xətti ilə yerinə yetirilmiş elmi-tədqiqat işlərinin yekununa həsr olunan konfrans keçirilib.
Konfransda universitetin rektoru, professor İsmayıl Əliyev hər bir gənci cəmiyyətin təşkil etdiyi tədbirlərdə fəal olmağa çağırıb. Tələbə Elmi Cəmiyyətinin tələbələrin universitetdə aparılan elmi-tədqiqat işlərinə cəlb olunmasına, elmi axtarışlar aparmaq vərdişləri əldə etmələrinə şərait yaradan bir qurum olduğu vurğulanıb. Məqsəd isə elmə, biliyə marağı olan tələbələri üzə çıxarmaq, elmi-tədqiqat işlərinin aparılmasında onlara kömək etmək və istiqamətləndirməkdir.
Bildirilib ki, 2018-2019-cu tədris ilində Universitetin Tələbə Elmi Cəmiyyətinin (TEC) xətti ilə 137 elmi-tədqiqat işi yerinə yetirib.
Konfransda həmçinin tələbələrin müxtəlif mövzularda hazırladıqları elmi-tədqiqat işləri təqdim olunub.
Sonra konfrans işini on bölmə üzrə davam etdirib. Tələbələr müasir informasiya-kommunikasiya vasitələrindən istifadə etməklə elmi məqalələrin bütün detallarını, cədvəlləri, şəkilləri, diaqramları əyani şəkildə konfrans iştirakçılarına çatdırıblar. Sonra tələbələrin məruzələri dinlənilib, müzakirələr aparılıb.
Seyfur Hacımuradov