Qələbə günü münasibətilə tədbir - FOTOLAR
NUHÇIXAN xəbər verir ki, Sədərək rayonunda 1941-1945-ci illər müharibəsində alman faşizmi üzərində qazanılan qələbənin 74-cü ildönümü münasibətilə tədbir keçirilib. Tədbirdən əvvəl rayon ictimaiyyətinin nümayəndələri, müharibə veteranları, rayonun müxtəlif idarə, müəssisə və təşkilatlarının əməkdaşları Sədərək kəndindəki Şəhidlər xiyabanında 1941-1945-ci illər və Azərbaycan Vətən müharibəsi iştirakçılarının əziz xatirəsinə ucaldılan abidələrin önünə gül dəstələri qoyublar. Şəhidlərimizin əziz xatirəsi bir dəqiqəlik sükutla yad olunub.
Sonra Heydərabad qəsəbəsində, çay süfrəsi arxasında davam etdirilən tədbirdə rayon İcra Hakimiyyətinin başçısı Həbib İbrahimov bildirib ki, 1941-1945-ci illər müharibəsində Sədərək kəndindən 462 nəfər iştirak edib. Onların 263 nəfəri qəhrəmancasına həlak olub. Bildirilib ki, müharibə veteranları daim dövlətin qayğısı ilə əhatə olunur. Bu insanların mənzillərlə, şəxsi minik maşınları ilə təmin edilmələri, onların müalicə olunmaq üçün müxtəlif sanatoriyalara, pansionatlara göndərilmələri, digər problemlərinin həll olunması üçün dövlətimiz tərəfindən bütün mümkün tədbirlər həyata keçirilib.
Rayon İcra Hakimiyyətinin başçısı müharibə və arxa cəbhə veteranlarını qələbənin 74-cü ildönümü münasibətilə təbrik edib.
Tədbirdə çıxış edən Naxçıvan Muxtar Respublikası Müharibə, Əmək və Silahlı Qüvvələr Veteranları Şurasının Sədərək rayon təşkilatının sədri Əkbər Kərimov, Yeni Azərbaycan Partiyası Sədərək rayon Təşkilatının sədri, Naxçıvan Muxtar Respublikası Ali Məclisinin deputatı Arif Qasımov və Qadınlar Şurasının sədri, Naxçıvan Muxtar Respublikasının Ali Məclisinin deputatı Vüsalə Əliyeva tez bir zamanda düşmən tapdağı altında olan torpaqlarımızdada bu cür qələbənin qeyd ediləcəyinəəminliklərini ifadə ediblər.
Sonra veteranlara qiymətli hədiyyələr təqdim olunub.
Tədbirin bədii hissəsində rayon Mədəniyyət şöbəsinin “Qeyrət Qalası” instrumental ansamblı üzvlərinin ifasında səsləndirilən mahnılar, nümayiş olunan ədəbi-bədii kompozisiya tədbir iştirakçıları tərəfindən alqışlarla qarşılanıb.
Sərxan İsmayilov