Naxçıvanda gənclərin əsgərlərlə görüşü - FOTOLAR
Naxçıvan Muxtar Respublikası Gənclər və İdman Nazirliyinin təşkilatçılığı, Əlahiddə Ümumqoşun Ordunun dəstəyi ilə bir qrup könüllü gəncin hərbi hissələrdən birinə ziyarəti təşkil olunub. Gənclər hərbi qulluqçularla görüşüb, onlar üçün yaradılmış şəraitlə tanış olublar.
Nazirliyin mətbuat xidmətindən NUHÇIXAN-a bildirilib ki, ordu mənsubları İntiqam Ağasiyev və Mansur Mahmudov çıxış edərək, Azərbaycan Ordusunun peşəkarlığından, yüksək döyüş hazırlığından və hərbi xidmətin gənclərin formalaşmasında rolundan danışıblar. Nazirliyin əməkdaşı Valeh Mahmudov isə gənclərin vətənpərvər ruhda tərbiyəsinin və milli dövlətçilik dəyərlərinə sədaqətinin möhkəmləndirilməsinin əsas prioritetlərdən olduğunu bildirib. Bu istiqamətdə hərbi hissələrə ziyarətlərin və əsgər-zabitlərlə görüşlərin əhəmiyyətini vurğulayıb.
Görüş çərçivəsində hərbi texnika və silahlara baxış keçirilib, onların texniki xüsusiyyətləri barədə məlumat verilib. Qonaqlar əsgərlərimizin əlbəyaxa döyüş və fiziki hazırlıq elementlərindən ibarət nümunəvi çıxışlarını izləyiblər.
Sonra ölkəmizin müasir hərb tarixinin əks olunduğu muzey və kitabxana ziyarət edilib. İştirakçılar hərbi qulluqçuların məişət şəraiti ilə tanış olublar.
Sonda gənclər əsgərlərimizlə birgə nahar edib, xatirə şəkilləri çəkdiriblər.