Akademik Məmməd Cəfər Cəfərovun 110 illik yubileyi qeyd olunub - FOTOLAR
AMEA Naxçıvan Bölməsinin İnformasiya şöbəsindən NUHÇIXAN-a verilən xəbər görə, Bölmədə akademik Məmməd Cəfər Cəfərovun 110 illik yubileyinə həsr olunan elmi konfrans keçirilib.
Konfransda Bölmənin sədri, akademik İsmayıl Hacıyev bildirib ki, tədbir Prezident İlham Əliyevin akademik Məmməd Cəfər Cəfərovun 110 illiyinin qeyd edilməsi ilə bağlı imzaladığı Sərəncama əsasən keçirilir. Bölmə sədri akademik Məmməd Cəfər Cəfərovun elmi fəaliyyəti ilə bağlı ətraflı məlumat verib. Qeyd edilib ki, Azərbaycan Elmlər Akademiyasının Dil və Ədəbiyyat İnstitutunun direktoru işləmiş Məmməd Cəfər Cəfərov Azərbaycanda ədəbiyyat nəzəriyyəsi məktəbinin əsas yaradıcılarından biridir. Alim ölkə və dünya ədəbiyyatı tarixi, ədəbiyyat nəzəriyyəsi və estetika, fəlsəfə məsələlərinə dair fundamental əsərlər yazıb. Bundan əlavə, onun Nizami Gəncəvi, Məhəmməd Füzuli, Mirzə Fətəli Axundzadə, Cəlil Məmmədquluzadə, Hüseyn Cavid, Səməd Vurğun kimi qüdrətli söz ustalarının yaradıcılığına həsr olunan tədqiqat işləri işıq üzü görüb. 700-dən çox elmi məqalə, 30-dan artıq kitab və monoqrafiyanın, dərsliklərin müəllifidir.
Konfransda, həmçinin AMEA Naxçıvan bölməsinin əməkdaşlarının alimin elmi fəaliyyətinin müxtəlif istiqamətlərini əks mövzularda məruzələri dinlənilib.
Tədbir çərçivəsində alimin əsərlərindən ibarət sərgi də təşkil olunub.