Tərəvəzlərin yumurta ilə birgə qəbul edilməsi antioksidantların mənimsənmə dərəcəsini artırır

NUHÇIXAN “MedikForum”a istinadla xəbər verir ki, tərəvəzləri toyuq yumurtası ilə birgə yemək daha yaxşıdır. Tədqiqatlar göstərib ki, orqanizm bu zaman daha çox antioksidant alır.

Amerikalı alimlərin tədqiqatları nəticəsində məlum olub ki, tərəvəzlərin yumurta ilə birgə qəbulu zamanı orqanizmin faydalı maddələri mənimsəməsi əhəmiyyətli dərəcədə artır. Mütəxəssislər bu qənaətə gəliblər ki, xüsusilə, pomidorun, kahının və kökün tərkibində olan antioksidant maddələrin – karotinoidlərin miqdarı onların yumurta ilə birgə qəbulu zamanı 9 dəfəyədək arta bilər.

Alimlərin apardıqları eksperimentlərdə kişilər tərəvəz salatını müxtəlif variantda – tərkibində yumurta olan və tərkibində yumurta olmayan variantda qəbul ediblər. Məlum olub ki, salata yumurta əlavə edilən zaman orqanizmdə beta-karotin, alfa-karotin, likopin, lütein və zeaksantinin udulması artıb. Belə ki, lütein və zeaksantinin mənbəyi yumurta sarısında, digər maddələr isə tərəvəzlərin tərkibində olub.

Mütəxəssislər bu faydalı məsləhətdən istifadə etməyi və tərəvəz salatlarına toyuq yumurtası qatmağı tövsiyə edirlər. Onlar xatırladırlar ki, kökün tərkibindəki beta-kerotin orqanizmdə A vitamininə çevrilir, bu da öz növbəsində, görmə qabiliyyətinin yaxşılaşmasına və immun sisteminin möhkəmlənməsinə kömək edir. Pomidorun tərkibindəki likopin isə ağciyər, prostat, mədə xərçəngi xəstəliyinə tutulma riskini azaldır.