Yeni bağda ərik tingləri əkilib
Yaz yaşıllaşdırma tədbirləri başlayandan indiyə kimi Şərur rayonunda yeni meyvə bağları salınıb, mövcud bağlarda və meşə zolaqlarında bərpa işləri aparılıb. Bu sahələrə ümumilikdə 10 mindən çox meyvə tingi, meşə ağacı əkilib.
Rayonun Yuxarı Daşarx kəndində, Arpaçayın sahilindəki 1 hektar sahədə dibçəkdə yetişdirilmiş 400 ərik tingi basdırılıb. Yerli ərik növlərindən olan bu meyvə tingləri öz məhsuldarlığı və quraqlığa davamlığı ilə seçilir.
Qeyd edək ki, rayonun əksər yaşayış məntəqələrində yeni bağların, yaşıllıq zolaqlarının salınması bir ənənə şəklini alıb. Ailə təsərrüfatçıları, torpaq mülkiyyətçiləri yeni bağlar salmaqla ata-baba ənənəsini davam etdirirlər.
Ağacəkmə aksiyalarında rayondakı idarə, müəssisə və təşkilatların kollektivləri yaxından iştirak edirlər.
“Şərurun səsi” qəzeti