“Büdcə anlayışı” layihəsi çərçivəsində ilk təlim keçirilib

NUHÇIXAN xəbər verir ki, Naxçıvan Muxtar Respublikası Maliyyə Nazirliyi yanında Maliyyə Tədris Mərkəzinin təşkilatçılığı ilə Naxçıvan şəhər Heydər Əliyev adına tam orta məktəbdə “Büdcə anlayışı” layihəsi çərçivəsində ilk təlim keçirilib.

Təlimdə şagirdlərə slaydlar vasitəsi ilə “Büdcə anlayışı,” “Ailə büdcəsi”, “Məktəbli büdcəsi” haqqında geniş məlumat verilib.

Bildirilib ki, hər bir şagird öz büdcəsinə nəzarət etməli, gəlir və xərclərin planlaşdırmasına diqqəti artırmalıdır.

Tədbirin interaktiv hissəsində  interaktiv oyun  vasitəsi ilə  şərti ailənin gəlir və xərclərinin müqayisəli təhlili aparılıb. Məktəblilərin təqdimatı dinlənilib və səmərəli  büdcə planlaşdırılması  qaydaları  ətrafında müzakirələr aparılıb.

Sonda məktəbin kitabxanasına “Oxunması zəruri olan kitabların siyahısı”na daxil edilən kitablar, şagirdlərə hədiyyələr  təqdim olunub.

“Büdcə anlayışı” layihəsinin muxtar respublikanın digər ümumtəhsil məktəblərində  də  keçirilməsi nəzərdə tutulub.

                                                                 Novruz Məmmədov