ANAİB-in hesabat-seçki iclası keçirilib, Şəmil Sadiq yenidən sədr seçilib - FOTOLAR

NUHÇIXAN xəbər verir ki, Azərbaycan Nəşriyyatlar Assosiasiyasının (ANAİB) ikiillik fəaliyyət hesabatının dinlənilməsi və İdarə Heyətinin yenidən seçilməsi ilə bağlı hesabat-seçki iclası keçirilib.

İclasda əvvəlcə şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

ANAİB-in İdarə Heyətinin sədri Şəmil Sadiq ikiillik fəaliyyət hesabatını təqdim edərək həyata keçirilən layihələr, görülən işlər və əldə olunan nəticələr barədə məlumat verib. Bildirilib ki, altı illik fəaliyyəti ərzində Assosiasiya Azərbaycanda kitab və nəşriyyat sektorunun inkişafına mühüm töhfələr verib. Bu müddətdə Bakı, bölgələr və xarici ölkələrdə 30-dan çox kitab sərgisi təşkil olunub, yeni nəşrlərin çapı və satışına hərtərəfli dəstək göstərilib. Görülən işlər nəticəsində bir milyondan artıq oxucuya çatmaq mümkün olub.

Daha sonra Nəzarət-Təftiş Komitəsinin hesabatı dinlənilib və İdarə Heyətinə seçkilər keçirilib. Seçkilərin nəticələrinə əsasən, Şəmil Sadiq yenidən ANAİB-in İdarə Heyətinin sədri seçilib. Nurman Şahmərdanov katib, Veysəl Məmmədov, Fatimə Alxaz, Səbuhi Şahmursoy və Mübariz Həsənov isə İdarə Heyətinin üzvləri seçiliblər.

İclasda Azərbaycan Jurnalistlər Birliyinin sədri Elçin Şıxlı, professor Qulu Məhərrəmli, deputat Elçin Mirzəbəyli, Mədəniyyət Nazirliyinin şöbə müdiri Vasif Qurbanzadə, sektor müdiri Xəyal Məmmədov, eləcə də naşirlər və yazarlar iştirak ediblər.

Tədbirdə ANAİB-in gələcək fəaliyyət istiqamətləri, nəşriyyat sektorunun inkişafı, kitab nəşrinin və satışının genişləndirilməsi, oxu mədəniyyətinin təşviqi ilə bağlı məsələlər də müzakirə olunub.