Süni intellekt bağırsaq xərçənginin müalicəsində yeni imkanlar üzə çıxarıb - Tədqiqat
Süni intellektin köməyi ilə aparılan beynəlxalq tədqiqat bağırsaq xərçənginin müalicəsində yeni imkanlar aşkar edib.
NUHÇIXAN xəbər verir ki, araşdırma xəstəliyin müalicəsi çətin olan mikrosatellit stabil (MSS) formasında şişlərin zəif nöqtələrini müəyyənləşdirərək mövcud dərmanların yeni kombinasiyalarından istifadə perspektivlərini ortaya qoyub.
İrlandiyanın RCSI Tibb və Səhiyyə Elmləri Universiteti və London Xərçəng Tədqiqatları İnstitutunun rəhbərlik etdiyi tədqiqatın nəticələri nüfuzlu “Cancer Cell“ jurnalında dərc olunub.
Məlumata görə, İrlandiyada hər il təxminən 2500 yeni bağırsaq xərçəngi halı qeydə alınır. Bunların 80-85 faizini MSS kolorektal xərçəngi təşkil edir. Bu xəstəlik bir çox yeni müalicə üsuluna məhdud reaksiya verdiyindən, daha effektiv terapiyaların hazırlanması əsas problemlərdən biri olaraq qalır.
Tədqiqatçılar 2000 xəstəyə aid şiş nümunələrindən əldə olunan genetik, metabolik, zülal və klinik məlumatları təhlil ediblər. Bunun üçün şişlərin bioloji xüsusiyyətləri arasındakı mürəkkəb əlaqələri müəyyənləşdirən “iPhenMap” adlı süni intellekt yanaşması hazırlanıb.
Təhlillər nəticəsində şişlərin böyüməsinə və uyğunlaşmasına təsir edən, əvvəllər müəyyənləşdirilməmiş zəifliklər aşkarlanıb. Laboratoriya modellərində aparılan sınaqlar göstərib ki, həmin zəiflikləri hədəfləyən müəyyən dərman kombinasiyaları şişlərin inkişafını məhdudlaşdıra bilər.
Tədqiqatın rəhbərlərindən olan RCSI Universitetinin professoru Annette Byrne bildirib ki, xüsusilə standart müalicələrə cavab verməyən metastatik kolorektal xərçəng xəstələrinin yeni müalicə seçimlərinə ehtiyacı var. Onun sözlərinə görə, əldə olunan nəticələr perspektivli imkanlar yaratsa da, yanaşmaların klinik praktikada tətbiqindən əvvəl əlavə araşdırmalar aparılmalıdır.
London Xərçəng Tədqiqatları İnstitutunun professoru Anguraj Sadanandam isə müxtəlif ölkələrdən toplanan genişhəcmli məlumatların inteqrasiyasının şiş biologiyası ilə dərmanlara həssaslıq arasındakı əlaqələri üzə çıxarmağa imkan verdiyini vurğulayıb.
Tədqiqatçılar hesab edirlər ki, yeni yanaşma artıq təsdiqlənmiş dərmanların fərqli kombinasiyalarla istifadəsinə dair klinik sınaqların hazırlanmasını sürətləndirə bilər. Süni intellekt metodunun gələcəkdə digər xərçəng növlərinin müalicəsi üçün də potensial dərman hədəflərinin müəyyənləşdirilməsində tətbiqi nəzərdə tutulur.
Qeyd edək ki, tədqiqat Avropa İttifaqının Horizon 2020 proqramı və Research Ireland tərəfindən maliyyələşdirilib. Nəticələr hələ ilkin mərhələdədir və onların xəstələrdə effektivliyi ilə təhlükəsizliyinin təsdiqlənməsi üçün əlavə tədqiqatlara ehtiyac var.