Ali təhsil ocağında Soltan Hacıbəyovun 100 illiyi qeyd edilib - FOTOLAR
Naxçıvan Dövlət Universitetinin Televiziya, mətbuat və ictimaiyyətlə əlaqələr bölməsindən NUHÇIXAN-a verilən xəbərə görə, ali təhsil ocağında Soltan Hacıbəyovun 100 illik yubileyinə həsr olunmuş elmi-praktik konfrans keçirilib. Tədbirdə Universitetin rektoru, AMEA-nın müxbir üzvü Saleh Məhərrəmov Soltan Hacıbəyovun anadan olmasının 100-cü ildönümünün qeyd olunması ilə bağlı Azərbaycan Respublikasının Prezidenti İlham Əliyevin Sərəncamını diqqətə çatdırıb. Vurğulanıb ki, Soltan Hacıbəyov respublikanın mədəni və ictimai həyatında daim yaxından iştirak edib, pedaqoq kimi gənc kadrların hazırlanması istiqamətində uzun illər fəaliyyət göstərib.
Musiqinin tarixi və nəzəriyyəsi kafedrasının müəllimi Vüsalə Əmiyeva bəstəkarın Azərbaycan simfonik musiqisinin təşəkkülü və inkişafında onun mühüm xidmətləri olduğunu bildirib. Geniş diapazonlu yaradıcılığa malik olan bəstəkar simfoniya, simfonik lövhə və süitalar, həmçinin opera və balet, dram tamaşalarına musiqi, mahnı və romansları ilə Azərbaycanın mədəniyyət xəzinəsini daha da zənginləşdirib.
Tədbir bəstəkarın əsərlərindən ibarət konsert proqramı ilə başa çatıb.