Naxçıvan şəhərinin abidələri ilə bağlı yeni monoqrafiya - FOTOLAR

NUHÇIXAN xəbər verir ki, Azərbaycan Milli Elmlər Akademiyasının Naxçıvan Bölməsində “Naxçıvan şəhərinin epiqrafik abidələri” monoqrafiyasının təqdimatı  olub.

Bölmənin sədri akademik İsmayıl Hacıyev monoqrafiyanın Tarix, Etnoqrafiya və Arxeologiya  institutunun direktoru Azərbaycan Milli Elmlər Akademiyasının  müxbir üzvü professor Fəxrəddin Səfərli tərəfindən ərsəyə gətirildiyini bildirib. Qeyd edilib ki, Naxçıvan şəhərinin epiqrafik abidələri haqqında ayrı-ayrı məqalələrdə, bəzi kitab və monoqrafiyalarda  yığcam  şəkildə  məlumat verilsə də bu abidələr  bütünlüklə sistemli tədqiqata cəlb olunmayıb, onlar haqqında ayrıca kitab və monoqrafiya yazılmayıb. Kitab Naxçıvan şəhərinin  epiqrafik  abidələrinə həsr olunan ilk monoqrafik əsərdir. Əsərdə Naxçıvan şəhərində indiyədək qalan kitabələrlə yanaşı, vaxtı ilə tədqiqatçılar tərəfindən  tədqiq olunan, ancaq müəyyən səbəblərdən zəmanəmizədək  gəlib çatmayan  bir neçə kitabədən, həmçinin muxtar respublikanın müxtəlif yaşayış məskənlərindən gətirilərək şəhərdə fəaliyyət göstərən muzeylərdə  nümayiş olunan müsəlman epiqrafikası  abidələrindən də bəhs olunub.

Monoqrafiyada  bəhs olunan kitabə  mətnlərinin Azərbaycan  dilinə tərcüməsi və fotoşəkillərin yerləşdirilməsinin  bu sahə ilə məşğul olan tarixçilər, alimlər, doktorantlar, magistrlər  üçün əhəmiyyətli olduğu diqqətə çatdırılıb.

Fəxrəddin Səfərli  elm adamlarına göstərilən diqqət və qayğıya görə Naxçıvan Muxtar Respublikası Ali Məclisinin Sədrinə minnətdarlıq edib.

Qeyd edək ki, kitabın elmi redaktoru  Azərbaycan Milli Elmlər Akademiyasının Naxçıvan Bölməsin sədri akademik İsmayıl Hacıyevdir.                                             

                                                                          Novruz Məmmədov