Yeni peşə kurslarına start verilib - FOTOLAR

NUHÇIXAN xəbər verir ki, “2016-2020-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın icrası uyğun olaraq Naxçıvan Muxtar Respublikası Əmək və Əhalinin Sosial Müdafiəsi Nazirliyi tərəfindən muxtar respublikanın bütün rayonlarındakı kənd xidmət mərkəzlərində fəaliyyət göstərən bərbər, gözəllik salonu və dərzi sexlərində monitorinqlər aparılır. Həmçinin xidmət mərkəzlərində mövcud olan vakansiyalar üzrə çalışmaq istəyən şəxslər müəyyənləşdirilərək müvafiq  peşə kurslarına cəlb edilirlər.

Artıq Naxçıvan Regional Peşə Tədris Mərkəzində “Bərbər-manikürçü” peşə hazırlığı kursu üzrə 20, “Bərbər” peşəsi üzrə isə 17 olmaqla, ümumilikdə 37 müdavimin iştirak edəcəyi peşə kurslarına start verilib.

Bu kurslara cəlb olunanlardan 4-ü sağlamlıq imkanları məhdud şəxslərdir. Bununla yanaşı, hazırda mərkəzdə dərzi və çilingər peşələri üzrə hazırlıq kursları da davam etdirilir. Bu kurslarda ümumilikdə 31  müdavim iştirak edir.

Məhəmməd Fərəcov